वीरगंज (पर्सा), १० माघ । नेपाली कांग्रेस पर्सा निर्वाचन क्षेत्र नं. २ का प्रतिनिधिसभा सदस्य उम्मेदवार अजय कुमार चौरसियाले राष्ट्रिय स्वतन्त्र पार्टीका वरिष्ठ नेता तथा प्रधानमन्त्रीका आकांक्षी बालेन्द्र साह (बालेन) विरुद्ध कडा र विवादास्पद अभिव्यक्ति दिएका छन् ।
वीरगंजस्थित नगर सभागृहमा आयोजित कांग्रेसको क्षेत्रीय भेलालाई सम्बोधन गर्दै पूर्वमन्त्री तथा निवर्तमान सांसद चौरसियाले बालेन साहलाई ‘लुसिफर’को संज्ञा दिँदै उनको गतिविधिकै कारण सिंहदरबार लगायत देशका विभिन्न संरचना ध्वस्त भएको दाबी गरे । उनले बालेन साह प्रधानमन्त्री बने मुलुकको अवस्था कस्तो हुने हो भन्ने प्रश्नसमेत उठाए ।
सभामा बोल्ने क्रममा चौरसियाले बालेन साहप्रति लक्षित गर्दै आपत्तिजनक आरोपहरू लगाए । उनले भने, ‘बालेन गजेडी हुन्, गाँजा सेवनका कारण उनका आँखाहरू रातो देखिन्थे, अहिले उपचार गराएर चुनाव लड्न आएका छन् ।’ साथै, उनले बालेन साहको र्याप संगीत, गायन शैली र जीवनशैलीप्रति टिप्पणी गर्दै यस्ता व्यक्तिले देशको नेतृत्व गरे मुलुकको भविष्य कस्तो हुन्छ भनेर प्रश्न गरे ।
चौरसियाले अमेरिकामा वृद्ध आमाबुबालाई घरमा नराखी आश्रममा राख्ने संस्कृतिको प्रसंग जोड्दै बालेन साह त्यही सोचबाट प्रभावित भएको दाबी गरे । यही कारणले कांग्रेसलाई मतदान गर्नुपर्ने उनको आग्रह थियो । कार्यक्रममा चौरसियाले नेपाली कांग्रेसले देशभरका १६५ निर्वाचन क्षेत्रमध्ये १२० स्थानमा नयाँ उम्मेदवार अघि सारेको उल्लेख गर्दै पार्टीभित्र पुस्तान्तरण भएको दाबी गरे ।
पार्टी सभापति आफूभन्दा करिब १५ वर्ष कान्छो रहेको उदाहरण दिँदै उनले कांग्रेसको नेतृत्वमै देशको विकास सम्भव हुने धारणा राखे । कांग्रेस पर्सा–२ का क्षेत्रीय सभापति महमद सहाबुदिनको सभापतित्वमा सम्पन्न उक्त भेलामा पर्सा क्षेत्र नं. १ का उम्मेदवार अनिल रुंगटा, क्षेत्र नं. ३ का उम्मेदवार सुरेन्द्र प्रसाद चौधरी, क्षेत्र नं. ४ का उम्मेदवार रमेश रिजाललगायत नेताहरूको उपस्थिति रहेको थियो ।
प्रतिक्रिया दिनुहोस् !