वीरगंज (पर्सा), ५ माघ । जनता समाजवादी पार्टी (जसपा) नेपाल परित्याग गरी पूर्व मन्त्री प्रदीप यादवसहित वीरगंज महानगरपालिकाका मेयर राजेशमान सिंह नेकपा (एमाले)मा प्रवेश गरेका छन् । उनीहरूसँगै पर्सा जिल्लाका यादव समूह निकट अन्य नेताहरू पनि एमालेमा समाहित भएका छन् ।
आइतबार राति एमाले अध्यक्ष तथा पूर्व प्रधानमन्त्री केपी शर्मा ओलीको भक्तपुरस्थित निजी निवास गुण्डुमा आयोजित विशेष कार्यक्रममा पार्टी प्रवेश गराइएको हो । उक्त कार्यक्रममा अध्यक्ष ओलीले निवर्तमान सांसद प्रदीप यादव, मेयर राजेशमान सिंहलगायत नवप्रवेशी नेताहरूलाई खादा लगाएर स्वागत गरेका थिए ।
पार्टी प्रवेशसँगै अध्यक्ष ओलीले आगामी प्रतिनिधिसभा उपनिर्वाचनमा पर्सा निर्वाचन क्षेत्र नम्बर १ बाट प्रदीप यादवलाई एमालेको उम्मेदवार बनाउने घोषणा गरेका छन् । यादव यसअघि २०७४ र २०७९ मा सोही क्षेत्रबाट दुई पटक प्रतिनिधिसभा सदस्य निर्वाचित भइसकेका छन् । २०७९ को निर्वाचनमा उनले २२ हजार ५३७ मत प्राप्त गरी विजयी भएका थिए ।
जसपा नेपालले पर्सा-१ बाट जिल्ला अध्यक्ष रामनरेश यादवलाई उम्मेदवार बनाएर आफूलाई ‘सहिद बनाउने षड्यन्त्र’ गरेको महसुस भएपछि पार्टी परित्याग गरेको प्रदीप यादवले बताएका छन् । ‘एमालेले मप्रति विश्वास गरेर उम्मेदवार बनाएको छ, यसका लागि अध्यक्ष केपी ओलीज्यूप्रति आभारी छु,’ उनले भने । मङ्गलवार मनोनयन दर्ता रहेकाले सोमबार नै निर्वाचन क्षेत्रमा पुगेर चुनावी अभियान सुरु गर्ने तयारी रहेको उनले बताएका छन् ।
प्रदीप यादवसँगै वीरगंज महानगरपालिकाका मेयर राजेशमान सिंह, पूर्व प्रदेशसभा सदस्य जनत अन्सारीलगायत नेताहरू पनि एमालेमा प्रवेश गरेका छन् । स्रोतका अनुसार एमालेले पर्सा क्षेत्र नम्बर २ बाट पूर्व मेयर तथा केन्द्रीय सदस्य विजयकुमार सरावगीलाई प्रतिनिधिसभा उम्मेदवार बनाउने र आगामी स्थानीय तह निर्वाचनमा हालका मेयर राजेशमान सिंहलाई नै टिकट दिने विषयमा समझदारी भएको छ । तर सरावगी भने प्रतिनिधिसभा निर्वाचनमा उम्मेदवारी दिन इच्छुक नरहेको बुझिएको छ ।
पार्टी प्रवेशको वातावरण बनाउन एमाले केन्द्रीय सदस्य प्रभु हजरा र निर्मला देवकोटा कोइरालाले प्रमुख भूमिका खेलेका थिए । उनीहरू अध्यक्ष ओलीको तर्फबाट नवप्रवेशी नेताहरूसँग पछिल्ला केही दिनदेखि निरन्तर संवादमा थिए ।
प्रदीप यादवको राजनीतिक यात्रा छोटो अवधिमै उतारचढावपूर्ण रहँदै आएको छ । ओली नेतृत्वको सरकारमा खानेपानी मन्त्री बनेका उनी गत भदौमा भएको जेनजी युवा आन्दोलनपछि सरकारबाट बाहिरिएका थिए । त्यसपछि अशोक राई नेतृत्वको जसपा परित्याग गरी गत पुस १४ गते उपेन्द्र यादव नेतृत्वको जसपा नेपालमा प्रवेश गरेका थिए। तर जसपा नेपालमा एकीकरण भएको २० दिनमै उनले पुनः पार्टी परिवर्तन गरेका हुन् ।
यस घटनाले वीरगंजको राजनीतिक वृत्तमा नयाँ तरङ्ग सिर्जना गरेको छ । २०७९ को स्थानीय तह निर्वाचनमा एमालेका विजय सरावगी र जसपाका राजेशमान सिंहबीच कडा प्रतिस्पर्धा भएको थियो । उक्त निर्वाचनमा राजेशमान सिंहले ४६ हजार २१५ मत ल्याएर विजय हासिल गर्दा सरावगीले २३ हजार ६७१ मत मात्र प्राप्त गरेका थिए ।
प्रतिक्रिया दिनुहोस् !