सिन्धुली, १ माघ । नेपाल एसबिआई बैंक लुट प्रकरणमा पक्राउ परेका लुटेराहरूले बैंक लुट्ने योजना घरधनीकै रहेको बयान दिएपछि बैंक सञ्चालन भइरहेको घरका घरधनी छविलाल स्याङतानलाई प्रहरीले पक्राउ गरेको छ । उनलाई महोत्तरी जिल्लाबाट नियन्त्रणमा लिइएको प्रहरीले जनाएको छ ।
प्रहरीका अनुसार बैंक लुटिएकै दिन बिहान स्याङतान ‘सवारी चालक अनुमतिपत्र (ड्राइभिङ लाइसेन्स) बनाउने’ बहानामा महोत्तरीतर्फ गएको खुलेको छ । प्रारम्भिक अनुसन्धान तथा पक्राउ परेका लुटेराहरूको बयानका आधारमा बैंक लुट्ने सम्पूर्ण योजना घरधनी स्याङतानकै रहेको, लुटिएको रकम तराई क्षेत्रमा भाग लगाउने सहमति भएको तथा सोही योजनाअनुसार उनी महोत्तरी पुगेको आशय देखिएपछि थप अनुसन्धानका लागि उनलाई पक्राउ गरिएको प्रहरीले स्पष्ट पारेको छ ।
यसै प्रकरणमा बैंक लुट्न सहयोग गरेको आरोपमा घरधनी स्याङतानसँगै अर्का स्थानीय चतुरमान बज्युलाई पनि प्रहरीले नियन्त्रणमा लिएको छ । बज्यु घरधनी स्याङतानका साला भएको खुलेको छ । पक्राउ परेका लुटेराहरूले बैंक लुट्ने योजनादेखि कार्यान्वयनसम्मका चरणमा बज्युले आफूहरूलाई सहयोग गरेको बयान दिएका छन् ।
लुटेराहरूको प्रारम्भिक बयानअनुसार बैंक लुट्ने मुख्य योजना घरधनीकै थियो भने आफूहरूलाई उक्त योजनामा प्रयोग गर्ने जिम्मेवारी स्याङतानका साला चतुरमान बज्युलाई दिइएको थियो । लुटपछि आफूहरूलाई सुरक्षित स्थानमा लैजाने, व्यवस्थापन गर्ने र रकम बाँडफाँड गर्ने जिम्मेवारीसमेत बज्युले पूरा नगरेको भन्ने आशयका बयान लुटेराहरूले प्रहरीसमक्ष दिएका छन् ।
गत पुस २९ गते राति सिन्धुली जिल्लाको घ्याङलेख गाउँपालिका–२ हायुटारमा रहेको नेपाल एसबिआई बैंकमा सशस्त्र लुटपाट भएको थियो । उक्त घटनामा लुटेराहरूले ३ करोड ११ लाख रुपैयाँ नगद लुटेका थिए । घटनापछि प्रहरीले तीव्र अनुसन्धान गर्दै हालसम्म करिब २ करोड ६८ लाख रुपैयाँ बराबरको रकम बरामद गरिसकेको छ । बाँकी रकमको खोजी तथा घटनामा संलग्न अन्य व्यक्तिहरूको पहिचान र पक्राउका लागि अनुसन्धानलाई अझ व्यापक र तीव्र बनाइएको प्रहरीले जनाएको छ ।
प्रहरीका अनुसार यस प्रकरणमा संलग्न सबै व्यक्तिहरूलाई कानुनी दायरामा ल्याउने प्रयास जारी रहेको छ भने घटनासम्बन्धी थप विवरण अनुसन्धान पूरा भएपछि सार्वजनिक गरिने बताइएको छ । 
प्रतिक्रिया दिनुहोस् !