जनकपुर (धनुषा), ३० पुस । सङ्घीय गृहमन्त्री ओमप्रकाश अर्यालले प्रतिनिधिसभा निर्वाचनलाई सफलतापूर्वक सम्पन्न गराउनु सुरक्षा निकायमा आबद्ध सबैको साझा दायित्व भएको बताएका छन् । जनकपुरधाममा आयोजित प्रदेशस्तरीय सुरक्षा गोष्ठीलाई सम्बोधन गर्दै उनले आगामी फागुन २१ गते निष्पक्ष र शान्तिपूर्ण रूपमा निर्वाचन सम्पन्न हुने विश्वास व्यक्त गरे ।
गृहमन्त्री अर्यालले निष्पक्ष निर्वाचन सुनिश्चित गर्न सुरक्षा निकायका सबै अङ्गलाई गम्भीरता र उच्च जिम्मेवारीका साथ आ–आफ्नो कार्यक्षेत्रमा खटिन निर्देशन दिए । ‘निर्वाचन सफल बनाउन सुरक्षा निकायका सबै संयन्त्र पूर्ण रूपमा परिचालित हुनुपर्छ,’ उनले भने ।
उनले निर्वाचनलाई सफल बनाउन राजनीतिक दल, नागरिक समाज र सञ्चारकर्मीको भूमिका पनि महत्वपूर्ण हुने उल्लेख गर्दै समाजमा द्वन्द्व फैलाउने गतिविधिमा संलग्न नहुन सम्बद्ध सबै पक्षलाई आग्रह गरे । प्रचलित कानुनविपरीत कार्य गर्ने जो–कोहीलाई कानुनबमोजिम कारबाही गरिने चेतावनीसमेत दिए, जसमा सामाजिक सञ्जालको दुरुपयोगप्रति विशेष ध्यानाकर्षण गराइएको थियो ।
जेन–जी पुस्ताको चाहनाअनुसार वर्तमान सरकार गठन भएको उल्लेख गर्दै गृहमन्त्री अर्यालले सुशासन कायम गर्नु र तोकिएको मितिमै निर्वाचन सम्पन्न गराउनु सरकारको प्रमुख कार्यादेश भएको स्पष्ट पारे । उनले राष्ट्रले सुम्पिएको जिम्मेवारी उच्च मनोबलका साथ पूरा गर्न सुरक्षा निकायका पदाधिकारीलाई आग्रहसमेत गरे । लुटिएका हतियार क्रमशः फिर्ता हुँदै गएको तथा सीमित साधन र स्रोतका बाबजुद नेपाल प्रहरी, सशस्त्र प्रहरी बललगायत सुरक्षा निकायहरू निर्वाचनलाई सफल बनाउन प्रतिबद्ध भएर लागिपरेको गृहमन्त्री अर्यालले बताए ।
गोष्ठीमा मधेश प्रदेशका आठवटै जिल्लाका सुरक्षा समितिका पदाधिकारीहरूले आ–आफ्नो जिल्लाको सुरक्षा अवस्था, विद्यमान चुनौती र आसन्न निर्वाचनलाई लक्षित सुरक्षा रणनीतिबारे विस्तृत छलफल गरेका थिए । बैठकमा तीनवटै सुरक्षा निकायका प्रमुख, नेपाली सेनाका रथी, सङ्घीय गृह मन्त्रालयका गृहसचिव राजकुमार श्रेष्ठ, सहसचिव आनन्द काफ्ले लगायत उच्च पदस्थ सरकारी अधिकारी तथा कर्मचारीहरूको उपस्थिति रहेको थियो ।
गोष्ठीले प्रदेशको समग्र सुरक्षा व्यवस्थालाई थप मजबुत बनाउँदै आगामी प्रतिनिधिसभा निर्वाचनलाई सुरक्षित, निष्पक्ष र मर्यादित रूपमा सम्पन्न गर्न महत्वपूर्ण योगदान पुर्याउने अपेक्षा गरिएको छ ।
प्रतिक्रिया दिनुहोस् !