वीरगंज (पर्सा), २६ पुस । आगामी माघ १५, १६ र १७ गते वीरगंजमा आयोजना हुन गइरहेको मधेश साहित्य महोत्सव २०२६ को दोस्रो संस्करणको तयारीका विषयमा सरोकारवाला निकाय र नागरिक समाजका प्रतिनिधिहरूबीच शनिबार छलफल सम्पन्न भएको छ । उत्कर्ष नेपालका अध्यक्ष ऋतुराजको अध्यक्षतामा सम्पन्न छलफलमा महोत्सवको उद्देश्य, विषयवस्तु, सहभागिता र कार्यक्रम संरचनाबारे गहन विचार–विमर्श गरिएको हो ।
उत्कर्ष नेपालको आयोजनामा हुन लागेको महोत्सवलाई सफल बनाउन आयोजित छलफलमा यस वर्षको मुख्य विषयवस्तु ‘गाउँ मन्थन’ रहने जानकारी आयोजक समूहकी सलमा खातुनले गराइन् । उनले मधेशका सबै क्षेत्र, समुदाय र वर्गको अर्थपूर्ण सहभागिता सुनिश्चित गर्दै ग्रामीण जीवन, संस्कृति र आवाजलाई प्राथमिकताका साथ उजागर गरिने बताइन् ।
कार्यक्रमको उद्देश्यबारे स्पष्ट पार्दै उत्कर्ष नेपालका जय साहले भाषा, साहित्य र संस्कृतिको संरक्षण तथा प्रवर्द्धनका लागि मधेश साहित्य महोत्सव आवश्यक रहेको उल्लेख गरे । साहित्य, संस्कृति र सामाजिक संवादलाई थप सशक्त बनाउने लक्ष्यका साथ महोत्सव आयोजना गरिन लागेको उनले बताए ।
छलफलमा नेपाल पत्रकार महासंघ पर्साका अध्यक्ष ओमप्रकाश खनाल, नेपाल भोजपुरी समाजका अध्यक्ष ध्रुवसिंह ठकुरी, प्रकृति सेवा प्रतिष्ठानका जसपाल सिंह, सामाजिक अभियन्ता प्रकाश थारु, लिडरसिप डेभलपमेन्ट इन्स्टिच्युटका प्रबन्ध निर्देशक अनिल जैयसवाल, मानव सेवा आश्रमका देवेश गुप्ता, नेपाल इनोभेटिभ सोसाइटीका अध्यक्ष कमल चौगाई, जेन–जी प्रतिनिधि विशेष साहलगायत सहभागीहरूले आ–आफ्ना सुझाव प्रस्तुत गरेका थिए ।
सहभागीहरूले प्यानल छलफलका विषयहरू श्रोताको रुचिअनुसार तय गर्नुपर्ने, वक्ताहरू सबै क्षेत्र र समुदायबाट समावेशी रूपमा चयन गर्नुपर्ने तथा मधेशका भाषा, साहित्य, संस्कृति र परम्परालाई प्राथमिकताका साथ समेटिनुपर्ने सुझाव दिएका थिए । साथै, तराई–मधेशमा विवाहमा गाइने परम्परागत गीत, स्थानीय संस्कृति, खानाका परिकार तथा स्थानीय उत्पादनलाई स्टलमार्फत प्रस्तुत गर्ने विषयमा समेत छलफल भएको थियो ।
यसैबीच, महोत्सवमा प्रस्तुत गरिने रचनाको छनोटका लागि माघ ३ गते ‘ट्यालेन्ट हन्ट’ कार्यक्रम आयोजना गरिने र त्यसमार्फत छनोट भएका रचनालाई मात्रै मुख्य कार्यक्रममा समावेश गरिने जानकारी उत्कर्ष नेपालका जय साहले दिएका छन् ।
प्रतिक्रिया दिनुहोस् !