पोखरिया (पर्सा), २६ पुस । मधेश प्रदेशका मुख्यमन्त्री कृष्ण प्रसाद यादवले पोखरियास्थित प्रदेशिक अस्पतालको समग्र विकासका लागि प्रदेश सरकार पूर्ण रूपमा प्रतिबद्ध रहेको स्पष्ट पारेका छन् । पर्सा जिल्लाको दोस्रो सदरमुकामका रूपमा रहेको पोखरियामा प्रदेशिक अस्पतालको उद्घाटन समारोहलाई सम्बोधन गर्दै उनले अस्पताललाई सक्षम, प्रभावकारी र जनमैत्री बनाइने बताए ।
मुख्यमन्त्री यादवले मधेश प्रदेश सरकार अन्तर्गतका मेडिकल सुपरिटेन्डेन्ट, चिकित्सक तथा स्वास्थ्यकर्मीहरूलाई प्रदेशिक अस्पतालहरूमा सरुवा गरिसकिएको जानकारी दिँदै सरुवा भएर तोकिएको स्थानमा नजाने स्वास्थ्यकर्मीमाथि कडा कारबाही गरिने निर्देशन मन्त्रालयका सचिवलाई दिइसकेको बताए । उनका अनुसार प्रदेशिक अस्पतालहरूको सेवा प्रभावकारी बनाउन जनशक्ति व्यवस्थापनमा कुनै सम्झौता गरिने छैन ।
वीरगंज वरपरका बासिन्दाले सहज रूपमा स्वास्थ्य सेवा प्राप्त गरिरहे पनि जिल्लाको पश्चिम क्षेत्रका नागरिकलाई वीरगंज आवतजावत र महँगो उपचार खर्चले समस्या पर्ने गरेको उल्लेख गर्दै मुख्यमन्त्री यादवले यही कारण पोखरियास्थित प्रदेशिक अस्पताललाई दक्ष र व्यवस्थित बनाउन आवश्यक रहेको बताए । अस्पतालको भौतिक संरचना सुदृढ गर्ने, दक्ष चिकित्सकको व्यवस्था गर्ने तथा अत्यावश्यक उपकरण जडान गरी गुणस्तरीय स्वास्थ्य सेवा उपलब्ध गराइने उनको प्रतिबद्धता थियो ।
मुख्यमन्त्री यादवले मधेश प्रदेश मन्त्रिपरिषद्को निर्णयअनुसार प्रदेशमा चारवटा प्रदेशिक अस्पताल स्थापना गरिने र तीमध्ये पोखरिया अस्पताल पनि समावेश रहेकाले यसको विकासमा प्रदेश सरकारको पूर्ण सहयोग रहने स्पष्ट गरे । साथै, पोखरिया क्षेत्रको समग्र विकासलाई लक्षित गर्दै टाउन हल र रंगशालाका लागि विनियोजित बजेटलाई निरन्तरता दिई बहुवर्षीय योजनाअन्तर्गत सम्पन्न गरिने घोषणा पनि गरे ।
यसै अवसरमा बोल्दै मधेश प्रदेशका स्वास्थ्य मन्त्री जंगीलाल यादवले पोखरिया अस्पताल अब प्रदेशिक अस्पतालको रूपमा स्थापित भइसकेकाले यसलाई आधुनिक प्रविधियुक्त मोडल अस्पतालको रूपमा विकास गरिने बताए । बाहिरका अस्पताल सरह सुलभ, सहज र गुणस्तरीय स्वास्थ्य सेवा पोखरियामै उपलब्ध गराउने लक्ष्यसहित अस्पताललाई नमुना अस्पताल बनाइने उनले प्रतिबद्धता जनाए ।
प्रदेशिक अस्पताल पोखरियाको उद्घाटन मुख्यमन्त्री कृष्ण प्रसाद यादव र स्वास्थ्य मन्त्री जंगीलाल यादवले संयुक्त रूपमा सिलालेख अनावरण गर्दै गरेका थिए । अस्पताल विकास समितिका अध्यक्ष उमेश चौहानको अध्यक्षतामा सम्पन्न कार्यक्रममा पूर्व मन्त्री सुरेन्द्र प्रसाद चौधरी, मधेश प्रदेशका कृषि मन्त्री श्याम प्रसाद पटेल, वन तथा वातावरण मन्त्री शंकर प्रसाद चौधरी, पूर्व कृषि मन्त्री तथा प्रदेश सांसद जनार्धन क्षेत्री, पूर्व खेलकुद मन्त्री प्रमोद जयसवाल, मधेश प्रदेश स्वास्थ्य मन्त्रालयका सचिव प्रमोद यादव, स्वास्थ्य कार्यालय पर्साका प्रमुख विनोद झा, पोखरिया नगरप्रमुख प्रद्युम्न चौहान, पूर्व नगरप्रमुख दीप नारायण रौनियार, पूर्व उपप्रमुख सलमा खातुन, प्रदेशिक अस्पताल पोखरियाका मेडिकल सुपरिटेन्डेन्ट आनन्द रौनियारलगायतको उल्लेखनीय उपस्थिति रहेको थियो ।
कार्यक्रममा सहभागी वक्ताहरूले पोखरिया अस्पताल तथा आसपासका क्षेत्रको विकास निर्माणसँग सम्बन्धित चुनौती र सम्भावनामाथि धारणा राख्दै अस्पतालको दीर्घकालीन प्रगतिका लागि शुभकामना व्यक्त गरेका थिए । कार्यक्रमको सञ्चालन स्वास्थ्य सह–संयोजक शिव पटेलले गरेका थिए ।
प्रतिक्रिया दिनुहोस् !