वीरगंज (पर्सा), २५ पुस । २५औँ सशस्त्र प्रहरी दिवसका अवसरमा सशस्त्र प्रहरी बल, नेपाल नम्बर १३ गण हेडक्वार्टर पर्साले विभिन्न सामाजिक सेवामूलक कार्यक्रम सञ्चालन गरेको छ । दिवसको अवसरमा सशस्त्र प्रहरीले वीरगंज कारागारमा रहेका ६२ जना महिला कैदीबन्दीलाई सल वितरण गरेको छ भने उनीहरूसँग रहेका पाँच जना बालबालिकालाई न्यानो कपडा उपलब्ध गराएको छ ।
सशस्त्र प्रहरी बल नेपाल नम्बर १३ गण हेडक्वार्टरका गणपति तथा सशस्त्र प्रहरी उपरीक्षक पुरनचन्द्र भट्टले मानवीय सहायताअन्तर्गत न्यानो कपडा वितरण गरिएको जानकारी दिए । यसैक्रममा सशस्त्र प्रहरीले वीरगंज महानगरपालिका–१ छपकैयाँस्थित बविता पराजुली आधारभूत विद्यालयको प्राङ्गणमा निःशुल्क आँखा शिविर पनि सञ्चालन गरेको छ ।
शिविरबाट ७८ जना स्थानीय बासिन्दाले आँखा परीक्षण तथा परामर्श सेवा लिएका छन् । सशस्त्र प्रहरी दिवसका अवसरमा सञ्चालन गरिएका यी कार्यक्रमहरूले समुदायसँगको सहकार्य र सामाजिक उत्तरदायित्वलाई थप मजबुत बनाएको सशस्त्र प्रहरी बलले जनाएको छ । 
प्रतिक्रिया दिनुहोस् !