वीरगंज (पर्सा), २२ पुस । पर्सा जिल्ला निर्वाचन क्षेत्र नम्बर–३ मा नेकपा एमालेको क्षेत्रीय समन्वय कमिटीको बैठकमा प्रतिनिधि सभा सदस्यका उम्मेदवार छनोटलाई लिएर विवाद उत्पन्न भएको छ । विवादका कारण बैठकले उम्मेदवारको टुंगो लगाउन नसकेको क्षेत्रीय अध्यक्ष फरमान मियाँले जानकारी दिए ।
आगामी फागुनमा हुने प्रतिनिधि सभा सदस्य निर्वाचनलाई केन्द्रमा राख्दै सम्पन्न बैठक क्षेत्रीय संयोजक फरमान मियाँको अध्यक्षता तथा केन्द्रीय कमिटी सदस्य प्रभु हजराको प्रमुख आतिथ्यमा बसेको थियो । बैठकमा प्रतिनिधि सभाका लागि १० जना आकांक्षीको नाम प्रस्ताव गरिएको थियो ।
बैठकमा पूर्व मन्त्री तथा निर्वतमान प्रतिनिधि सभा सदस्य राजकुमार गुप्ता र रुपेश पाण्डेको नाम उम्मेदवारका रूपमा प्रस्ताव भएपछि विवाद उत्पन्न भएको अध्यक्ष मियाँले बताए । उनका अनुसार राजकुमार गुप्तामाथि भ्रष्टाचार मुद्दा विचाराधीन रहेकाले र रुपेश पाण्डे हालसम्म पार्टी प्रवेश नगरेको अवस्थाका कारण दुवैको नाम सिफारिस गर्नु नहुने भन्दै बैठकमा असहमति देखिएको हो ।
यद्यपि, रुपेश पाण्डेले क्षेत्रीय समितिमा उम्मेदवारका लागि औपचारिक निवेदन दिएको जानकारी पनि अध्यक्ष मियाँले दिए । विवादका कारण उम्मेदवार छनोटको निर्णय बुधबारसम्मका लागि स्थगित गरिएको छ ।
यसैबीच, बैठकमा उम्मेदवारका लागि तेजप्रकाश निषाद, शिव पटेल, भगवान कुर्मी, मञ्जुर अंसारी, प्रमोद जयसवाल, रामबाबु यादव, मनिर मियाँ र मञ्जु देवी कुर्मीको नाम पनि प्रस्ताव गरिएको थियो । अब यी सबै नामहरूबारे पुनः छलफल गरी अन्तिम निर्णय गरिने एमाले पर्सा–३ ले जनाएको छ । 
प्रतिक्रिया दिनुहोस् !