वीरगंज (पर्सा), २१ पुस । प्रहरीले नक्कली नोट छाप्ने मेसिनसहित बाराका दुई जनालाई काठमाडौंबाट पक्राउ गरेको छ । पक्राउ पर्नेमा बाराको कलैया उपमहानगरपालिका-२ निवासी ४२ वर्षीय गौरीशंकर यादव र बाराको फेटा गाउँपालिका-३ घर भई हाल भारतको मोतिहारी लाला टोल पतौना बस्ने २८ वर्षीय सबी कुमार श्रीवास्तव रहेका छन् ।
प्रहरीका अनुसार नक्कली नोटको कारोबार भइरहेको गोप्य सूचनाका आधारमा पुस १६ गते खटिएको प्रहरी टोलीले काठमाडौंको गोकर्णेश्वर नगरपालिका-८ उत्तरखेल चोकबाट एक हजार दरका ९३ थान नक्कली नोटसहित छ जनालाई नियन्त्रणमा लिएको थियो । त्यसपछि सुरु गरिएको अनुसन्धानका क्रममा यस घटनामा यादवको संलग्नता देखिएको थियो ।
सोधपुछका क्रममा यादवले आफू नक्कली नोट छाप्ने कार्यमा संलग्न रहेको स्वीकार गर्दै, श्रीवास्तवले नक्कली नोट छाप्न प्रयोग हुने सामग्री पुस २० गते नेपाल ल्याउन लागेको जानकारी दिएको प्रहरीले जनाएको छ । उक्त सूचनाका आधारमा प्रहरीले जिल्ला प्रहरी कार्यालय बारासँग समन्वय गर्दै जिल्ला प्रहरी परिसर काठमाडौं र प्रहरी वृत्त बौद्धको संयुक्त टोली खटाएको थियो ।
सो टोलीले बीआर ०५ एएफ २५११ नम्बरको भारतीय बुलेट मोटरसाइकलको पछाडिको सिटमा नक्कली नोट छाप्ने मेसिन, कम्प्युटर तथा अन्य प्रिन्टिङ उपकरण काठमाडौं लैजाँदै गरेको अवस्थामा श्रीवास्तवलाई नियन्त्रणमा लिएको काठमाडौंका प्रहरी प्रवक्ता एवं प्रहरी उपरीक्षक पवनकुमार भट्टराईले जानकारी दिए ।
पक्राउ परेका व्यक्तिहरूको साथबाट प्रहरीले पाँच वटा गाडीमा भारतीय पाँच सय दरका ३१७ थान नक्कली नोट, मोनिटर, किबोर्ड, माउस, केबल तार १० थान, मोबाइल फोन, कलर प्रिन्टर, सिपियु, ‘एम अडियो’ लेखिएको बक्स, टोनर ८ थान, नक्कली पेस्तोल तथा लालिगुराँसको वाटरमार्क छापिएको ‘१०००’ लेखिएको कागज १८० थान बरामद गरेको छ । साथै ७५ थान सादा कागजसमेत फेला परेको प्रहरीले जनाएको छ ।
प्रहरीका अनुसार यस घटनासँग सम्बन्धित थप अनुसन्धान भइरहेको छ भने नक्कली मुद्रा कारोबारको सञ्जालबारे विस्तृत छानबिन गरिँदैछ । 
प्रतिक्रिया दिनुहोस् !