वीरगंज (पर्सा), २१ पुस । जिल्ला प्रशासन कार्यालय पर्साले वीरगंज महानगरपालिकाका मुख्य तथा संवेदनशील क्षेत्रहरूमा निषेधाज्ञा जारी गरेको छ । जिल्ला सुरक्षा समितिको निर्णयअनुसार आज पुस २१ गते दिउँसो १ बजेदेखि अर्को आदेश जारी नभएसम्म तोकिएका क्षेत्रमा कुनै पनि प्रकारका भेला, सभा, जुलुस तथा प्रदर्शन पूर्ण रूपमा निषेध गरिएको छ ।
प्रशासनका अनुसार स्थानीय प्रशासन ऐन, २०२८ को दफा ६ को उपदफा ३ (क) बमोजिम निषेधाज्ञा आदेश जारी गरिएको हो । निषेधाज्ञा लागू हुने क्षेत्रको चार किल्ला पूर्वतर्फ बसपार्क, पश्चिमतर्फ सिर्सिया पुल, उत्तरतर्फ पावर हाउस चोक र दक्षिणतर्फ शङ्कराचार्य गेट निर्धारण गरिएको छ । यी चार किल्लाभित्र पर्ने क्षेत्र वीरगंजको केन्द्रीय तथा अत्यन्त व्यस्त इलाकामा पर्दछ ।
प्रशासनले जारी आदेशको उल्लङ्घन गर्ने जो कोहीलाई नियन्त्रणमा लिई कानुनअनुसार कडा कारबाही गरिने स्पष्ट चेतावनी दिएको छ । पछिल्ला दुई दिनदेखि वीरगंजमा सामाजिक तथा धार्मिक सद्भावमा खलल पुर्याउने गतिविधिहरू बढ्दै गएको सन्दर्भमा सम्भावित असहज स्थिति नियन्त्रणमा लिन निषेधाज्ञा जारी गरिएको अनुमान गरिएको छ ।
जिल्ला प्रशासनले सर्वसाधारण नागरिकलाई संयमता अपनाउन, शान्ति सुव्यवस्था कायम राख्न र अनावश्यक भिडभाड नगर्न आग्रह गरेको छ । स्थिति सामान्य नहुँदासम्म निषेधाज्ञा कायम रहने प्रशासनले जनाएको छ ।
प्रतिक्रिया दिनुहोस् !