वीरगंज (पर्सा), २० पुस । बहुक्षेत्रीय पोषण योजना अन्तर्गत पालिका स्तरीय पोषण तथा खाद्य सुरक्षा निर्देशक समितिको बैठक तथा अभिमुखीकरण कार्यक्रम आइतबार वीरगंजमा सम्पन्न भएको छ । स्थानीय तहमा पोषण र खाद्य सुरक्षासम्बन्धी कार्यक्रमलाई अझ प्रभावकारी रूपमा कार्यान्वयन गर्ने उद्देश्यले आयोजित कार्यक्रममा आवश्यक परे बजेट वृद्धि गर्ने र विभिन्न निकायबीच सहकार्य विस्तार गर्ने प्रतिबद्धता व्यक्त गरिएको छ ।
कार्यक्रमका प्रमुख अतिथि वीरगंज महानगरपालिकाका निमित्त प्रमुख प्रशासकीय अधिकृत अरबिन्द लाल कर्णले पोषणसम्बन्धी कार्यक्रमलाई महानगरपालिकाले उच्च प्राथमिकतामा राखेको उल्लेख गरे । उनले श्रोत साधनको प्रभावकारी व्यवस्थापन गर्दै सम्बन्धित निकायहरूसँग समन्वय र सहकार्यमार्फत पोषण तथा खाद्य सुरक्षाका कार्यक्रमलाई दिगो र परिणाममुखी बनाइने प्रतिबद्धता व्यक्त गरे ।
वीरगंज महानगरपालिका–२७ घुर्मीका अध्यक्ष हृदयानन्द प्रसादको अध्यक्षतामा सम्पन्न उक्त बैठकमा महानगर स्वास्थ्य शाखाका जनस्वास्थ्य निरीक्षक सुमन चन्द ठाकुरले प्रस्तुतीकरणमार्फत बहुक्षेत्रीय पोषण योजनाअन्तर्गत सञ्चालन हुने कार्यक्रमहरूको विस्तृत जानकारी गराए । उनका अनुसार यो कार्यक्रम वीरगंज महानगरपालिकाका वडा नम्बर १६, २२, २७ र ३२ मा लक्षित रूपमा सञ्चालन गरिनेछ ।
कार्यक्रम संयोजक खुशबू श्रीवास्तवले जानकारी दिँदै करिब २० लाख रुपैयाँको लागतमा प्रत्येक २५–२५ जनाको समूह गठन गरी पोषण तथा खाद्य सुरक्षासम्बन्धी विभिन्न सचेतनामूलक तथा व्यवहार परिवर्तनमुखी गतिविधि सञ्चालन गरिने बताइन् । यसले समुदायस्तरमै पोषण सुधार र खाद्य सुरक्षामा सकारात्मक प्रभाव पार्ने अपेक्षा गरिएको छ ।
बैठक तथा अभिमुखीकरण कार्यक्रममा सहभागी प्रतिनिधिहरूले स्थानीय तहमा पोषण अवस्था सुधार, खाद्य सुरक्षा सुदृढीकरण तथा समुदायको सक्रिय सहभागितामार्फत कार्यक्रमलाई सफल बनाउने प्रतिबद्धता व्यक्त गरेका थिए । सहभागीहरूले आपसी समन्वय, नियमित अनुगमन र स्थानीय स्रोतको अधिकतम उपयोगमार्फत बहुक्षेत्रीय पोषण योजनालाई प्रभावकारी रूपमा कार्यान्वयन गर्नेमा जोड दिएका थिए । 
प्रतिक्रिया दिनुहोस् !