वीरगंज (पर्सा), २० पुस । राष्ट्रिय स्वतन्त्र पार्टी (रास्वपा) पर्साका सभापति हरी पन्तले आगामी फागुन २१ गते हुने प्रतिनिधि सभा निर्वाचनपछि मुलुकले पहिलो पटक मधेसी प्रधानमन्त्री पाउने दाबी गरेका छन् । उनले मधेसका युवा नेता बालेन्द्र साहलाई प्रधानमन्त्रीका रूपमा देशले पाउने स्पष्ट अभिव्यक्ति दिँदै यसले राष्ट्रिय राजनीतिमा ऐतिहासिक मोड ल्याउने विश्वास व्यक्त गरेका हुन् ।
रास्वपा वीरगंज महानगरपालिका–१ को प्रथम ऐतिहासिक वडा भेलालाई सम्बोधन गर्दै सभापति पन्तले मधेसको छोरा बालेन्द्र साहलाई प्रधानमन्त्रीका रूपमा अघि सार्नु सम्पूर्ण मधेसबासीका लागि गर्व र सम्मानको विषय भएको उल्लेख गरे । उनले अब मधेसको छोरालाई प्रधानमन्त्री बन्नबाट कसैले पनि रोक्न नसक्ने दृढ आत्मविश्वास व्यक्त गर्दै जनताको समर्थन नै सबैभन्दा ठूलो शक्ति भएको धारणा राखे ।
वीरगंजको बजार छपकैया क्षेत्रमा सम्पन्न उक्त वडा भेलाले धु्रप साहको सभापतित्वमा ११ सदस्यीय वडा समिति गठन गरेको छ । गठित समितिको उपसभापतिमा मनोज कुमार र सचिवमा धीरज साह कलवार चयन भएका छन् । त्यस्तै सदस्यहरूमा धुरेन्द्र साह तेली, ललन पासवान, लालचन कुमार कानु, धर्मेन्द्र दास, असलम मिया, राधे साह तेली, गिरिजा देवी ठाकुर र उमाराबती देवी चयन भएका छन् । साथै, सल्लाहकारका रूपमा बैजु साह, मिकाइल मिया र श्याम साहलाई मनोनीत गरिएको छ ।
राष्ट्रिय स्वतन्त्र पार्टी वीरगंज महानगरपालिकाका सभापति अमन आलमको सभापतित्वमा सम्पन्न उक्त भेलामा वडा नम्बर १ का सयौं वडाबासीहरूले राष्ट्रिय स्वतन्त्र पार्टीमा प्रवेश गर्दै पार्टीप्रति जनआकर्षण बढ्दो रहेको सन्देश दिएका थिए ।
भेलाको सहजीकरण कृष्णा पासवानले गरेका थिए भने कार्यक्रमलाई पार्टीका केन्द्रीय सदस्य डा. नन्दन यादव, क्षेत्रीय सभापति राम आर्यलगायतका नेताहरूले सम्बोधन गरेका थिए । किसान साहले स्वागत मन्तव्य राखेको उक्त कार्यक्रममा महानगर उपसभापति परितोष द्विवेदी, सचिव गौतम श्रेष्ठ, जिल्ला सचिव सुदिष प्रजापति, कोषाध्यक्ष दिलीप कुर्मी, फैयाद मिया लगायतका नेताहरूको उल्लेखनीय उपस्थिति रहेको थियो ।
कार्यक्रममा वक्ताहरूले पार्टीको संगठन विस्तार, मधेसको राजनीतिक प्रतिनिधित्व र समावेशी नेतृत्वको आवश्यकता बारे जोड दिँदै आगामी निर्वाचनमा रास्वपालाई बलियो विकल्पका रूपमा स्थापित गर्ने प्रतिबद्धता व्यक्त गरेका थिए । 
प्रतिक्रिया दिनुहोस् !