वीरगंज (पर्सा), २० पुस । पर्सा जिल्लामा अवैध आर्थिक कारोबारविरुद्ध प्रहरीले कडा कारबाही गरेको छ । जिल्ला प्रहरी कार्यालय पर्साले श्रोत नखुलेको १० लाख २ हजार १० रुपैयाँ नगदसहित तीन जनालाई पक्राउ गरेको छ ।
पक्राउ पर्नेमा पर्सा जिल्लाको सखुवा प्रसौनी गाउँपालिका–४ देवरवाना निवासी २२ वर्षीय पवन कुमार साह, ३० वर्षीय मुस्ताक अन्सारी र १९ वर्षीय रामपुकार पासवान रहेका छन् । प्रहरीका अनुसार विशेष सूचनाको आधारमा शुक्रबार जिल्ला प्रहरी कार्यालयबाट खटिएको प्रहरी टोलीले पर्सा जिल्लाका विभिन्न स्थानमा निगरानी बढाउँदै हुण्डी कारोबारमा संलग्न व्यक्तिहरूलाई नियन्त्रणमा लिएको हो ।
सोही क्रममा जगरनाथपुर गाउँपालिका–३ स्थित गडैयाटोलको सडकखण्डबाट तीन जनालाई पक्राउ गरिएको प्रहरीले जनाएको छ । पक्राउ परेकाहरूको साथबाट श्रोत नखुलेको १० लाख २ हजार १० रुपैयाँ नगद तथा ना. १६ प ३०२० नम्बरको एनएक्सजी स्प्लेन्डर मोटरसाइकल बरामद गरिएको जिल्ला प्रहरी कार्यालय पर्साले जानकारी दिएको छ ।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक राजु कार्कीका अनुसार नियन्त्रणमा लिइएका व्यक्तिहरूविरुद्ध मुलुकी अपराध संहिता, २०७४ को दफा १२५ (क) अनुसार ‘हुण्डी सम्बन्धी कारोबार गर्न नहुने’ कसुरमा मुद्दा दर्ता गरिएको छ । पर्सा जिल्ला अदालतबाट सात दिनको म्याद थप अनुमति लिई उनीहरूमाथि थप अनुसन्धान भइरहेको प्रवक्ता कार्कीले जानकारी दिए ।
प्रवक्ता कार्कीले अवैध आर्थिक कारोबार नियन्त्रण गर्न प्रहरीले निगरानी थप कडा बनाएको उल्लेख गर्दै यस्ता गतिविधिमा संलग्न जो–कोहीलाई कानुनी दायरामा ल्याइने चेतावनी दिएका छन् । 
प्रतिक्रिया दिनुहोस् !