काठमाडौं, १९ पुस । भद्रपुर विमानस्थलमा शुक्रबार राति बुद्ध एयरको विमान दुर्घटना हुँदा चालक दलका एक सदस्यसहित सात जना यात्रु घाइते भएका छन् । दुर्घटना राति करिब ९ः१० बजे भएको थियो । काठमाडौंबाट भद्रपुरका लागि उडेको कलसाइन ९०१ रहेको बुद्ध एयरको एटीआर-७२ जहाज अवतरण गर्ने क्रममा रन-वेको पूर्वतर्फ करिब ३०० मिटर ओभर रन भई घाँसे झाडी र माटोमा भासिएर दुर्घटना भएको जिल्ला प्रहरी कार्यालय झापाका प्रहरी उपरीक्षक राजन लिम्बुले प्रारम्भिक जानकारी दिए ।
उक्त जहाजमा ५१ जना यात्रु, चार जना चालक दलका सदस्य र एक जना विमान इन्जिनियर सवार थिए । दुर्घटनामा ललितपुर-४ निवासी २४ वर्षीय को-पाइलट सुशान्त श्रेष्ठ र अन्य छ जना यात्रु घाइते भएका छन् ।
घाइते हुने यात्रुहरूमा भद्रपुर-१० का ४० वर्षीय सबिन जोगी, विर्तामोड-७ की २० वर्षीया प्रेषिका अधिकारी, विर्तामोड-१ की ४२ वर्षीया सुमित्रा जोगी, दमक-१ का २८ वर्षीय कमलप्रसाद कटुवाल, काठमाडौं-१६ की ४० वर्षीया मुना घतानी र काठमाडौं-१६ की १६ वर्षीया प्रिया घतानी रहेका छन् ।
दुर्घटनापछि नेपाल प्रहरीको उद्दार टोलीले तत्कालै घाइतेलाई भद्रपुरस्थित ओमसाई पाथिभरा हस्पिटलमा उपचारका लागि पुर्याएको थियो । टाउको र अनुहारमा चोट लागेका को-पाइलट सुशान्त श्रेष्ठको अस्पतालमा उपचार जारी रहेको छ । अन्य छ जना घाइते सामान्य उपचारपछि डिस्चार्ज भएर घर फर्किसकेको प्रहरी उपरीक्षक लिम्बुले जानकारी दिए ।
प्रहरीका अनुसार उक्त जहाज शुक्रबार राति ८ः२३ बजे काठमाडौंबाट उडेको थियो र ९ः१० बजे भद्रपुर विमानस्थलमा अवतरण गर्ने क्रममा दुर्घटनामा परेको हो । जहाज दुर्घटनामा परेलगत्तै जिल्ला प्रहरी कार्यालय झापाबाट प्रहरी उपरीक्षक राजन लिम्बुको कमाण्डमा ७० जना प्रहरीको टोली उद्दारका लागि खटिएको थियो ।
प्रहरीले सबै यात्रुलाई दुर्घटनाग्रस्त जहाजबाट सकुशल बाहिर निकाल्दै घाइतेलाई समयमै अस्पताल पुर्याएको जनाएको छ ।
छानविनमा सहयोग गर्ने बुद्ध एयरको प्रतिबद्धता
बुद्ध एयरले भद्रपुर विमानस्थलमा भएको जहाज दुर्घटनाको विस्तृत छानबिनका लागि नागरिक उड्डयन प्राधिकरणलाई पूर्ण रूपमा सहयोग गर्ने प्रतिबद्धता जनाएको छ । एयरलाइन्सले शनिबार एक विज्ञप्ति जारी गर्दै शुक्रबार काठमाडौंबाट भद्रपुरका लागि उडेको आफ्नो जहाज अवतरणका क्रममा रन-वे बाहिर गई दुर्घटनामा परेको घटनाको विस्तृत छानबिनमा प्राधिकरणलाई आवश्यक सबै सहयोग उपलब्ध गराउने जनाएको हो ।
दुर्घटनामा सामान्य घाइते भएका यात्रुहरू प्राथमिक उपचारपछि सकुशल घर फर्किसकेको बुद्ध एयरले जानकारी दिएको छ । उक्त विमानमा ५१ जना यात्रु सवार थिए । बुद्ध एयरले दुर्घटनापछि तत्काल उद्दार कार्यमा खटिएका नेपाल प्रहरी, नेपाली सेना, नागरिक उड्डयन प्राधिकरण तथा बुद्ध एयरका कर्मचारीहरूप्रति आभार व्यक्त गरेको छ ।
‘ढोका खोल्न नदिएको’ समाचारप्रति बुद्ध एयरको प्रष्टीकरण
बुद्ध एयरले झापाको भद्रपुर विमानस्थलमा भएको जहाज दुर्घटनापछि विमान परिचारिकाले ढोका खोल्न नदिएको भन्ने समाचारप्रति आपत्ति जनाउँदै प्रष्टीकरण दिएको छ ।
विमान कम्पनीले शुक्रबार भएको घटनाको वास्तविकता स्पष्ट पार्दै दुर्घटनापछि विमान रन–वेबाट बाहिर जाँदा बायाँपट्टि खाल्डो र पानी देखिएकाले सुरक्षा जोखिमका कारण सो तर्फको ढोका खोल्न उपयुक्त नभएको जनाएको छ । यात्रुहरूको सुरक्षालाई ध्यानमा राख्दै तत्काल निर्णय लिइएको बुद्ध एयरको दाबी छ ।
बुद्ध एयरका अनुसार विमान परिचारिकाले तोकिएको सुरक्षा प्रोटोकलअनुसार दायाँपट्टिको ढोकाको लक खोल्ने प्रयास गरेका थिए । ‘तर, ढोका ‘जाम’ भई नखुलेपछि उनले तत्काल निर्णय लिँदै यात्रुहरूलाई पछाडिको सर्भिस ढोकामार्फत सुरक्षित रूपमा बाहिर निकाल्न अग्रसर भएका थिए,’ कम्पनीले प्रष्टीकरणमा उल्लेख गरेको छ ।
त्यही क्रममा विमानमा सवार यात्रु उमेश मोक्तानले अगाडिपट्टिको दायाँ ढोका खोल्न र अन्य यात्रुहरूलाई छिटो सुरक्षित बाहिर निकाल्न महत्वपूर्ण सहयोग पुर्याएको बुद्ध एयरले जनाएको छ । ‘संकटको घडीमा देखाउनुभएको साहस, सूझबुझ र सहयोगका लागि हामी यात्रु उमेश मोक्तानप्रति हार्दिक आभार प्रकट गर्दछौं,’ बुद्ध एयरले भनेको छ ।
कम्पनीले मोक्तानको योगदानको कदर गर्दै उचित पुरस्कारद्वारा सम्मानित गर्ने घोषणा समेत गरेको छ ।
रन-वे छोट्याएर विमानस्थल सञ्चालनमा
भद्रपुर विमानस्थलमा शुक्रबार राति बुद्ध एयरको जहाज दुर्घटना भएपछि रन-वे छोट्याएर विमानस्थल पुनः सञ्चालनमा आएको छ ।
भद्रपुर विमानस्थल प्रमुख किशोरकुमार खत्रीका अनुसार दुर्घटनाग्रस्त जहाजको पछाडिको भाग अफ-ट्रयाकमा परेकाले हालका लागि रन-वे घटाएर विमान सञ्चालन गर्न थालिएको हो । उनका अनुसार विमानस्थलको १ हजार ५ सय मिटर लामो रनवे हाल १ हजार ४ सय मिटरमा सीमित गरी सञ्चालन भइरहेको छ ।
रन-वे छोट्याएर विमानस्थल सञ्चालन गरिएको विषयमा सबै पाइलटलाई नियमित रूपमा जानकारी गराइँदै आएको खत्रीले बताए । ‘अहिले विमानस्थल चालु छ । विमानस्थल सञ्चालनका लागि आवश्यक न्यूनतम मापदण्ड पूरा गरिएको छ,’ उनले भने, ‘दुर्घटनाग्रस्त जहाजको पछाडिको भाग अफ-ट्रयाकमा परेकाले त्यसलाई मिलाउन रनवे अलिकति छोट्याएका हौं । यसको जानकारी प्रत्येक आउने-जाने जहाजका पाइलटलाई दिइरहेका छौं ।’
उनका अनुसार सामान्य अवस्थामा १ हजार ५ सय मिटर रहेको रनवे हाल १ हजार ४ सय मिटरमा सञ्चालन भइरहेको छ र यो दूरी हालका लागि जहाज सञ्चालनका लागि पर्याप्त रहेको छ । सबै उडान सुरक्षालाई ध्यानमा राख्दै विमानस्थल सञ्चालन भइरहेको विमानस्थल प्रशासनले जनाएको छ । 
प्रतिक्रिया दिनुहोस् !