चितवन, १९ पुस । सञ्चार तथा सूचना प्रविधिमन्त्री जगदीश खरेलले देशभर कार्यरत सम्पूर्ण पत्रकारलाई सामाजिक सुरक्षा कोषमा आबद्ध गर्नुपर्ने आवश्यकता औँल्याएका छन् । नेपाल पत्रकार महासङ्घ चितवन शाखाको आज निरीक्षणपछि सञ्चारकर्मीसँग कुरा गर्दै मन्त्री खरेलले सरकारले सरकारी सञ्चार माध्यममा कार्यरत पत्रकारलाई सामाजिक सुरक्षा कोषमा जोड्ने कामको थालनी गरिसकेको जानकारी दिए ।
मन्त्री खरेलले पत्रकारका कार्यालयमा प्रवेश गर्दा आफ्नै घरमा प्रवेश गरेको अनुभूति भएको उल्लेख गर्दै कबथ चितवन शाखा अन्य शाखाको तुलनामा व्यवस्थित र राम्रो रहेको बताए । पत्रकारहरूको पेशागत सुरक्षाका विषयमा सरकार गम्भीर रहेको उल्लेख गर्दै उनले पत्रकारका समस्या समाधानका लागि वर्तमान सरकारले केही आधारशीला तयार गर्ने काम अघि बढाइरहेको स्पष्ट पारे ।
उनले लोककल्याणकारी विज्ञापनलाई पारदर्शी र सही तरिकाले सबै सञ्चारमाध्यमसम्म पुर्याउन जरुरी रहेकोमा पनि जोड दिए । ‘लोककल्याणकारी विज्ञापन सबै सञ्चारमाध्यमले समान रूपमा पाउने वातावरण बनाउन आवश्यक छ,’ मन्त्री खरेलले भने । निरीक्षणका क्रममा नेपाल पत्रकार महासङ्घ चितवन शाखाका अध्यक्ष वसन्त पराजुलीले जिल्लाको पत्रकारिता अवस्था, चुनौती र पत्रकारहरूले भोग्दै आएका समस्याबारे मन्त्री खरेललाई अवगत गराएका थिए ।
सोही क्रममा मन्त्री खरेलले समाचार सङ्कलनका क्रममा दुर्घटनामा परेका नेपाल टेलिभिजन चितवन समाचारदाता अनिल ढकालसँग भेट गरी स्वास्थ्य अवस्थाबारे जानकारी लिएका थिए । उनले ढकाललाई नेपाल टेलिभिजनमा निरन्तर रूपमा काम गर्न आवश्यक सहजीकरणका लागि आफू तयार रहेको प्रतिबद्धता जनाए ।
गत असोज महिनामा मुग्लिन–नारायणगढ सडकखण्डमा समाचार सङ्कलनका क्रममा दुर्घटनामा परेका ढकाल हाल उपचाररत छन् । दुर्घटनामा परी घाइते भएका ढकालको स्वास्थ्य अवस्थामा क्रमिक सुधार भइरहेको बताइएको छ । 
प्रतिक्रिया दिनुहोस् !