वीरगंज (पर्सा), १८ पुस । आगामी फागुन २१ गते हुने प्रतिनिधिसभा निर्वाचनका लागि उपेन्द्र यादव नेतृत्वको जनता समाजवादी पार्टी (जसपा) नेपाल, पर्साले जिल्लाका चारवटै निर्वाचन क्षेत्रबाट प्रत्यक्षतर्फका उम्मेदवारका लागि १२ जनाको नाम सिफारिस गरेको छ ।
शुक्रबार बसेको जसपा नेपाल पर्सा कार्यकारिणी समितिको बैठकले चारवटै निर्वाचन क्षेत्रका क्षेत्रीय समन्वय समितिबाट प्राप्त नामहरूलाई केन्द्रिय कार्यसमितिमा सिफारिस गर्ने निर्णय गरेको हो । जिल्ला अध्यक्ष रामनरेश प्रसाद यादवका अनुसार, क्षेत्रीय समितिबाट आएका नामहरूलाई कुनै हेरफेर नगरी केन्द्रमा पठाइएको हो ।
सिफारिसअनुसार, पर्सा निर्वाचन क्षेत्र नम्बर १ बाट पार्टीका महासचिव तथा पूर्वमुख्यमन्त्री लालबाबु राउत, मधेस प्रदेश अध्यक्ष बालकिशोर यादव र जिल्ला अध्यक्ष रामनरेश प्रसाद यादवको नाम सिफारिस गरिएको छ ।
त्यसैगरी, पर्सा क्षेत्र नम्बर २ बाट यसअघि २०७९ को निर्वाचनमा प्रत्यक्षतर्फ उम्मेदवारी दिएर पराजित भएका सुरेन्द्र प्रसाद कुर्मी, उद्योगपति अशोक कुमार टेमानी, पूर्व वडाध्यक्ष सन्तोष तिवारी, हालका वडाध्यक्ष आशुतोष चर्तुवेदी, कामेश पण्डित र वीरेन्द्र प्रसाद यादवको नाम सिफारिस गरिएको जिल्ला अध्यक्ष यादवले जानकारी दिए ।
पर्सा क्षेत्र नम्बर ३ बाट नगेन्द्र प्रसाद यादव र भरत गिरीको नाम सिफारिस गरिएको छ भने क्षेत्र नम्बर ४ बाट डा. कृपासिन्धु प्रसाद चौधरीको नाम केन्द्रिय कार्यसमितिमा सिफारिस गरिएको छ । डा. चौधरी केही दिनअघि मात्रै नेपाली कांग्रेस परित्याग गरी जसपा नेपालमा प्रवेश गरेका हुन् । उनी यसअघि कांग्रेसको महाधिवेशन प्रतिनिधि समेत रहेका थिए ।
तर, जसपा नेपाल पर्साले केन्द्रमा सिफारिस गरेका नामहरूमा हालै अशोक राई नेतृत्वको जसपा परित्याग गरी जसपा नेपालमै फर्किएका पूर्वमन्त्री तथा पर्सा – १ का निवर्तमान सांसद प्रदीप यादवको नाम समावेश गरिएको छैन । यादव २०७४ र २०७९ को निर्वाचनमा पर्सा – १ बाट लगातार दुई पटक प्रतिनिधिसभा सदस्यमा निर्वाचित भएका थिए ।
त्यस्तै, हालै जसपा नेपालसँग पार्टी एकता गरेको लोकतान्त्रिक समाजवादी पार्टी (लोसपा) का कुनै पनि नेताको नाम पनि पर्साबाट सिफारिस सूचीमा समावेश गरिएको छैन ।
यस विषयमा प्रतिक्रिया दिँदै जसपा नेपाल पर्साका अध्यक्ष रामनरेश प्रसाद यादवले पार्टीमा हालै प्रवेश गरेका नेताहरू र एकता गरेका अन्य दलका विषयमा केन्द्रिय कार्यसमितिबाट जिल्लालाई औपचारिक वा आधिकारिक जानकारी नआएको स्पष्ट पारे । ‘केन्द्रबाट अहिलेसम्म कुनै आधिकारिक सर्कुलर नआएकाले पहिले नै क्षेत्रीय समितिले सिफारिस गरेका नामहरू मात्रै केन्द्रमा पठाइएको हो,’ उनले भने ।
उनका अनुसार, केन्द्रबाट औपचारिक परिपत्र आएमा सिफारिस सूचीमा फेरबदल हुन सक्ने सम्भावना पनि छ । यता, पूर्वमन्त्री प्रदीप यादवले भने उपेन्द्र यादव नेतृत्वको जसपा नेपालसँग गरिएको पार्टी एकताको आधिकारिक परिपत्र जिल्ला तहमा पुगेपछि हाल सिफारिस भएका नामहरूमा व्यापक परिवर्तन हुने दाबी गरेका छन् ।
पर्सा जिल्लामा जसपा नेपालको उम्मेदवार सिफारिसले आगामी निर्वाचनलाई थप चासोपूर्ण बनाएको छ भने अन्तिम उम्मेदवार चयन केन्द्रिय कार्यसमितिको निर्णयपछि मात्रै टुंगो लाग्ने देखिएको छ । 
प्रतिक्रिया दिनुहोस् !