वीरगंज (पर्सा), १४ पुस । राष्ट्रिय स्वतन्त्र पार्टी (रास्वपा) र उज्यालो नेपाल पार्टी (उनेपा) बीच एकता सम्बन्धी सहमति पत्रमा औपचारिक रूपमा हस्ताक्षर भएको छ । मुलुकको परिवर्तित राजनीतिक परिस्थिति र नागरिकमा बढ्दो वैकल्पिक राजनीतिक शक्तिको अपेक्षालाई मध्यनजर गर्दै दुवै दलबीच सहकार्य र एकताको सहमति भएको जनाइएको छ ।
सहमति पत्रमा २०८२ साल भदौ २३ र २४ मा सम्पन्न जेन–जी आन्दोलनसहित विभिन्न कालखण्डमा भएका जनआन्दोलनका शहीद तथा घाइतेहरूको बलिदानप्रति सम्मान प्रकट गरिएको छ । साथै ती आन्दोलनमा सहभागी शहीद तथा घाइतेका परिवारले उठाएका मागहरूलाई यथोचित रूपमा सम्बोधन गर्ने प्रतिबद्धता व्यक्त गरिएको छ । भ्रष्टाचार र कुशासनविरुद्ध नवयुवाहरूले देखाएको आन्दोलनको मर्मलाई आत्मसात् गर्दै सामाजिक न्यायसहितको उदार अर्थतन्त्र र बहुलवादी लोकतान्त्रिक प्रणालीभित्र सुशासन कायम गर्ने लक्ष्य सहमतिमा उल्लेख गरिएको छ ।
एकतापछि स्थापित हुने राजनीतिक दलको नाम ‘राष्ट्रिय स्वतन्त्र पार्टी’ नै कायम रहने सहमति भएको छ । पार्टीको झन्डा साबिककै निलो पृष्ठभूमिमा सेतो गोलाकारभित्र निलो घण्टीको आकृतिसहित रहनेछ भने निर्वाचन चिन्ह पनि ‘घण्टी’ नै यथावत् रहने जनाइएको छ । पार्टीको केन्द्रीय कार्यालय काठमाडौँ उपत्यकामा रहने सहमति भएको छ ।
सहमति अनुसार राष्ट्रिय स्वतन्त्र पार्टीको केन्द्रीय सभापतिमा रवि लामिछाने रहनेछन् । त्यसैगरी उपसभापतिमा कुलमान घिसिङ, डी.पी. अर्याल र स्वर्णिम वाग्ले रहने सहमति भएको छ । उज्यालो नेपाल पार्टीका युवा अभियन्ता तथा अनुभवी विज्ञहरूलाई पार्टीको संगठनात्मक संरचनामा समुचित रूपमा समायोजन गरिने र जिम्मेवारी बाँडफाँड गर्दा योग्यता, समावेशिता तथा सार्वजनिक छविलाई मुख्य आधार बनाइने उल्लेख गरिएको छ ।
सहमति पत्रमा उज्यालो र आत्मनिर्भर अर्थतन्त्रको निर्माण, डेलिभरीमा आधारित राजनीति, मेरिटोक्रेसीको स्थापना, भ्रष्टाचारप्रति शून्य सहनशीलता र सुशासनको माध्यमबाट आगामी दश वर्षभित्र नेपाललाई सम्मानजनक मध्यम आय भएको राष्ट्र बनाउने लक्ष्यसहितको स्पष्ट मार्गचित्र इमानदारीपूर्वक कार्यान्वयन गर्ने प्रतिबद्धता पनि व्यक्त गरिएको छ ।
यसैगरी, सहमति बमोजिम राष्ट्रिय स्वतन्त्र पार्टीसँग सम्बन्धित सबै दस्तावेज निर्वाचन आयोगमा आवश्यक अद्यावधिक गरिने जनाइएको छ । लोकतान्त्रिक सुशासन, समुन्नति र सामाजिक न्यायका मुद्दामा विश्वास गर्ने अन्य वैकल्पिक तथा परिवर्तनकामी राजनीतिक शक्ति, समूह तथा व्यक्तिहरूलाई समेत एकताका लागि आव्हान गरिएको छ ।
सहमति पत्रमा राष्ट्रिय स्वतन्त्र पार्टीका सभापति रवि लामिछाने र उज्यालो नेपाल पार्टीका अध्यक्ष अनुपकुमार उपाध्यायले हस्ताक्षर गरेका छन् भने काठमाडौँ महानगरपालिकाका मेयर बालेन्द्र शाह साक्षीका रूपमा उपस्थित रहेका थिए । 
प्रतिक्रिया दिनुहोस् !