वीरगंज (पर्सा), १४ पुस । नेटवर्किङ व्यवसायमार्फत अनलाइन रोजगारी उपलब्ध गराइदिने भन्दै विभिन्न प्रलोभन देखाई ठगी गरेको आरोपमा प्रहरीले दुई जनालाई पक्राउ गरेको छ । पक्राउ पर्नेहरूमा पर्साको वीरगंज महानगरपालिका–२१ निवासी २६ वर्षीय श्रवणकुमार पटेल र कैलालीको लम्कीचुहा नगरपालिका–६ निवासी ४७ वर्षीय विष्णुबहादुर रावल रहेका छन् ।
गुल्मीका प्रहरी नायब उपरीक्षक गंगाबहादुर सारुका अनुसार उनीहरू दुवै जनालाई काठमाडौँबाट पक्राउ गरिएको हो । अनलाइनमार्फत सजिलै आम्दानी गर्न सकिने भन्दै आकर्षक योजना प्रस्तुत गरी ठूलो रकम असुली गरेको उजुरीका आधारमा उनीहरूमाथि अनुसन्धान अघि बढाइएको प्रहरीले जनाएको छ ।
पीडित गुल्मी जिल्लाको धुर्कोट गाउँपालिका–३, हाडहाडे निवासी २९ वर्षीया धनमाया नेपालीले ती दुई जनाले आफूबाट २६ लाख ९६ हजार ६५२ रुपैयाँ ठगी गरेको भन्दै प्रहरीमा उजुरी दिएकी थिइन् । उक्त उजुरीको आधारमा प्रारम्भिक अनुसन्धान गर्दा आरोप पुष्टि हुने देखिएपछि उनीहरूलाई पक्राउ गरिएको प्रहरी नायब उपरीक्षक सारुले जानकारी दिए ।
पक्राउ परेका दुवै प्रतिवादीलाई गुल्मी जिल्ला अदालतबाट म्याद थप गरी ठगीसम्बन्धी मुद्दामा थप अनुसन्धान भइरहेको प्रहरीले जनाएको छ । घटनासँग सम्बन्धित अन्य व्यक्ति संलग्न छन् कि छैनन् भन्ने विषयमा समेत अनुसन्धान भइरहेको बताइएको छ ।
अनलाइन रोजगारी र नेटवर्किङ व्यवसायको नाममा बढ्दै गइरहेको ठगीप्रति सचेत रहन प्रहरीले सर्वसाधारणलाई आग्रह गरेको छ । 
प्रतिक्रिया दिनुहोस् !