कोल्हवी (बारा), १३ पुस । इलाका प्रहरी कार्यालय कोल्हवी, बाराले लागू औषध ओसारपसारमा संलग्न रहेको आरोपमा तीन जनालाई नियन्त्रणमा लिएको छ । विशेष सूचनाको आधारमा गरिएको कारबाहीमा अफिम जस्तो देखिने ४६० ग्राम लागू औषध सहित तीनजालाई पक्राउ गरिएको प्रहरीले जनाएको छ ।
पक्राउ पर्नेमा रौतहट जिल्लाको चन्द्रपुर नगरपालिका वडा नम्बर १० निवासी ३२ वर्षीय राजेश साह, २९ वर्षीय नागेन्द्र साह र २२ वर्षीय ज्ञानेन्द्र राम रहेका छन् । जिल्ला प्रहरी कार्यालय बाराका निमित्त सूचना अधिकारी प्रहरी निरीक्षक सुरेश राज भट्टका अनुसार उनीहरूलाई लागू औषधसहित पक्राउ गरिएको हो ।
प्रहरीका अनुसार इलाका प्रहरी कार्यालय कोल्हवी, बारा र लागू औषध नियन्त्रण ब्यूरो शाखा कार्यालय वीरगंज, पर्साबाट संयुक्त रूपमा खटिएको प्रहरी टोलीले शनिबार दिउँसो करिब ३ः३० बजे उनीहरूलाई नियन्त्रणमा लिएको हो । कोल्हवी नगरपालिका वडा नम्बर ०१ बजारस्थित तामागढीबाट श्रीपुरतर्फ आउँदै गरेको प्र.२–०३–००५ प ६३१२ नम्बरको टीभीएस मोटरसाइकल शंकास्पद देखिएपछि रोकी चेकजाँच गरिएको थियो ।
चेकजाँचका क्रममा मोटरसाइकलमा सवार व्यक्तिहरूको साथबाट लागू औषध अफिम जस्तो देखिने पदार्थ फेला परेको प्रहरीले जनाएको छ । विशेषगरी राजेश साहको साथबाट लुकाइछिपाइ राखिएको अवस्थामा ४६० ग्राम अफिम जस्तो देखिने पदार्थ बरामद गरिएको हो ।
लागू औषध ओसारपसार कार्यमा संलग्न रहेको आरोपमा तीनै जना व्यक्तिसहित प्रयोग गरिएको मोटरसाइकलसमेत नियन्त्रणमा लिई थप अनुसन्धान भइरहेको इलाका प्रहरी कार्यालय कोल्हवीका प्रमुख प्रहरी निरीक्षक रन्जन मिश्रले जानकारी दिए ।
प्रहरीले घटनाबारे थप अनुसन्धान जारी रहेको र लागू औषध नियन्त्रणका लागि यस्ता अभियानलाई निरन्तरता दिइने जनाएको छ । 
प्रतिक्रिया दिनुहोस् !