कठमाडौं, ११ पुस । राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौँ महानगरपालिकाका मेयर बालेन्द्र शाह (बालेन) बीच वैकल्पिक राजनीतिक शक्तिहरूको एकताका लागि जारी छलफल अन्तिम चरणमा पुगेको छ । शुक्रवार दिनभरि सघन छलफल भएपनि केही विषयमा अन्तिम सहमति जुट्न नसक्दा शनिवार निर्णायक वार्ता हुने अपेक्षा गरिएको छ ।
दुवै पक्षका वार्ताकारहरूका अनुसार शुक्रवार बिहानदेखि रास्वपाको तर्फबाट शिशिर खनाल र असीम शाह तथा मेयर बालेनको तर्फबाट कुमार व्यञ्जनकार (बेन) र भूपदेव शाह सहभागी चार सदस्यीय कार्यदलले निरन्तर छलफल गरेको थियो । कार्यदलस्तरको छलफलमा वैकल्पिक शक्तिहरूबीच सहकार्यको खाका तयार पार्न विभिन्न राजनीतिक, संगठनात्मक र प्राविधिक विषयमा गहिरो संवाद भएको जनाइएको छ ।
श्रोतका अनुसार दिउँसोसम्म सहकार्यको पहिलो खाका तयार भए पनि केही प्राविधिक विषय र शक्ति बाँडफाँटका सवालमा टुङ्गो लाग्न बाँकी रहेको छ । काठमाडौँ महानगरपालिकाको नगर सभामा व्यस्तताका कारण मेयर शाह उपस्थित हुन नसक्दा अन्तिम मस्यौदामा हस्ताक्षर हुन नसकेको बताइएको छ ।
सहमति उन्मुख प्रमुख बुँदामध्ये रास्वपा सभापतिमा रवि लामिछाने नै कायम रहने र आगामी फागुन २१ गते हुने प्रतिनिधिसभा निर्वाचनपछि प्रधानमन्त्रीको उम्मेदवारका रूपमा बालेन्द्र शाहलाई अघि सार्ने प्रस्ताव मुख्य रहेको छ । यस प्रस्तावमा लामिछाने पक्ष सकारात्मक रहेको श्रोतले जनाएको छ ।
त्यस्तै, पार्टीको केन्द्रीय समितिमा बालेन पक्षलाई उपयुक्त स्थान दिने, सह–सभापति वा दोस्रो वरीयताको पद संरचना बनाउने विषयमा समेत छलफल सकारात्मक दिशामा अघि बढेको वार्ताकारहरूको भनाइ छ । संगठनात्मक समायोजन र नेतृत्व संरचनामा सहमतिका लागि थप गृहकार्य भइरहेको जनाइएको छ ।
मेयर शाहका एक सहयोगीले भने, ‘नयाँ र वैकल्पिक शक्तिहरू मिल्नुपर्छ भन्ने विषयमा दुवै पक्षबीच कुनै द्विविधा छैन । तर, सहमतिको पूर्ण खाका तयार पार्न केही समय लागिरहेको छ । समानुपातिक सूची बुझाउने मिति नजिकिँदै गर्दा छिट्टै टुङ्गो लाग्ने अपेक्षा छ ।’ उता रास्वपाका एक नेताले पनि सहमति उन्मुख रहेको जनाउँदै मोर्चा निर्माण गर्ने कि पूर्ण एकताको मोडालिटी अपनाउने भन्ने विषयमा अन्तिम छलफल भइरहेको बताए ।
यसअघि सोमबार राति करिब ६ घण्टा लामो ‘म्याराथन’ छलफलपछि रवि लामिछाने र बालेन्द्र शाह सहकार्यको सैद्धान्तिक सहमतिमा पुगेका थिए । त्यसयता मेयर शाहले विभिन्न राजनीतिक व्यक्तित्वहरूसँग परामर्श जारी राखेका छन् भने रास्वपाले पनि वैकल्पिक राजनीतिक शक्तिहरूसँग संवादलाई तीव्र बनाएको छ । कुलमान घिसिङ नेतृत्वको ‘उज्यालो नेपाल’सँग त्रिपक्षीय एकताको सम्भावना समेत कायम रहेको चर्चा राजनीतिक वृत्तमा चलिरहेको छ ।
जेनजी आन्दोलनपछि विकसित राजनीतिक परिस्थितिमा पुराना दलहरूलाई कडा चुनौती दिन वैकल्पिक शक्तिहरू एकजुट हुनुपर्ने आवाज बलियो बन्दै गएको छ । शुक्रवारसम्म अन्तिम सहमति नजुटे पनि दुवै पक्षका नेताहरूले छलफललाई सकारात्मक रहेको बताएका छन् । श्रोतका अनुसार शनिवार रवि लामिछाने र बालेन्द्र शाहबीच प्रत्यक्ष भेटवार्ता गरी अन्तिम टुङ्गो लगाउने तयारी भइरहेको छ ।
सहमति भएमा आगामी निर्वाचनमा रास्वपाको नाम र चुनाव चिह्न ‘घण्टी’ नै कायम रहने सम्भावना बलियो देखिएको छ । यद्यपि, अन्तिम निर्णय नआएसम्म बालेन पक्षले ‘देश विकास पार्टी’ (चिह्न : लौरो) को विकल्प पनि खुला राखेको बुझिएको छ ।
प्रतिक्रिया दिनुहोस् !