वीरगंज (पर्सा), ६ पुस । पर्सा प्रहरीले ठुलो परिमाणमा लागुऔषध चरेश सहित दुईजनालाई पक्राउ गरेको हो । पक्राउ पर्नेमा जिल्ला मकवानपुर थाहा नगरपालिका वडा नं. ११ बस्ने २९ वर्षका सरोज मोक्तान एवं सोही ठाउँ बस्ने २१ वर्षीय नवराज लो. रहेका छन् ।
विशेष सूचनाको आधारमा जिल्ला प्रहरी कार्यालय तथा वडा प्रहरी कार्यालय श्रीपुरबाट खटिएको संयुक्त टोलीले बीरगंज महानगरपालिका वडा नं.२२ जगरनाथपुर ढाँट स्थित सडकखण्डमा चेकजाँचको क्रममा २ सय ४० केजी लागुऔषध चरेश सहित दुबै जनालाई पक्राउ गरेको हो ।
मकवानपुरबाट वीरगंजतर्फ आउँदै गरेको ना. ३ ख ५०९३ नम्बरको ट्रकलाई रोकी चेकजाँच गर्दा उक्त ट्रकको केबिनको माथि फल्स बनाई लुकाई छिपाई राखिएको लागुऔषध चरेश बरामद गरिएको जिल्ला प्रहरी कार्यालय पर्साका प्रहरी नायब उपरीक्षक राजु कार्कीले जानकारी दिए । उनका अनुसार बरामद गरिएको लागुऔषध सहित ट्रक र चालक एवं ट्रकमा सवार अन्य एक जना गरि दुबैजनालाई पक्राउ गरिएको हो ।
पक्राउ परेका दुबैजनालाई ट्रक र लागुऔषध चरेश सहित जिल्ला प्रहरी कार्यालय पर्साको हिरासतमा राखी आवश्यक अनुसन्धान भइरहेको पर्सा प्रहरीले जनाएको छ । 
प्रतिक्रिया दिनुहोस् !