वीरगंज (पर्सा), ३ पुस । वीरगंजस्थित दृष्टि आँखा तथा नाक, कान, घाँटी (ईएनटी) अस्पतालमा बिहीबार एक बिरामीको आँखाको नानी (कोर्निया) को सफलतापूर्वक प्रत्यारोपण गरिएको छ । लामो समयदेखि दुवै आँखाको नानीमा गम्भीर समस्या देखिएपछि दृष्टिविहीन बनेका पर्सा जिल्लाको जिराभवानी गाउँपालिकाका ६१ वर्षीय राजदेव रामको आँखामा कोर्निया विशेषज्ञ चिकित्सकहरूको टोलीले नानी प्रत्यारोपण गरेका हुन् ।
अस्पतालका अनुसार प्रत्यारोपण शल्यक्रिया सफल भएको छ र हाल बिरामीको अवस्था सन्तोषजनक रहेको छ । शल्यक्रियापछि बिरामीलाई आवश्यक निगरानीमा राखिएको र क्रमशः स्वास्थ्यमा सुधार देखिएको जनाएको छ ।
वीरगंजमै सुरु भयो नानी प्रत्यारोपण सेवा
अस्पतालका संचालक अध्यक्ष विश्वराज गौतमका अनुसार, प्रमुख कोर्निया रोग विशेषज्ञ डा. भाइराजा श्रेष्ठको नेतृत्वमा दृष्टि आँखा तथा ईएनटी अस्पतालमा आँखाको नानी प्रत्यारोपण सेवा औपचारिक रूपमा सुरु गरिएको हो । उनले आँखाको नानी प्रत्यारोपण दृष्टि पुनःस्थापनाका लागि अत्यन्त प्रभावकारी उपचार विधि रहेको उल्लेख गर्दै समयमै उपचार गरिएमा बिरामीले पुनः दृष्टि पाउने सम्भावना उच्च रहने बताए ।
स्थानीय बिरामीलाई ठूलो राहत
वीरगंजमै आँखाको नानी प्रत्यारोपण सेवा उपलब्ध भएपछि यस क्षेत्रका आँखासम्बन्धी गम्भीर समस्या भएका बिरामीहरूलाई उपचारका लागि अन्य शहर वा बाहिर जानुपर्ने बाध्यता हटेको कोर्निया रोग विशेषज्ञ डा. मनिष खतिवडाले जानकारी दिए । उनले यस सेवाले मधेस क्षेत्रका दृष्टिविहीन तथा दृष्टि कमजोर भएका बिरामीहरूलाई ठूलो राहत पुग्ने विश्वास व्यक्त गरे ।
स्थानीय स्तरमै अत्याधुनिक आँखासम्बन्धी सेवा सुरु हुनु स्वास्थ्य क्षेत्रका लागि सकारात्मक उपलब्धिका रूपमा हेरिएको छ । 
प्रतिक्रिया दिनुहोस् !