वीरगंज (पर्सा), १ पुस । जनमत पार्टी पर्साले जिल्लाका चारवटै प्रतिनिधि सभा निर्वाचन क्षेत्रको क्षेत्रीय बैठक सम्पन्न गरेको छ । बैठकले यहीँ फागुन २१ गते हुने आसन्न प्रतिनिधि सभा निर्वाचनका लागि प्रारम्भिक उम्मेदवारहरूलाई सर्वसम्मत रूपमा सिफारिस गरेको हो ।
बैठकमा स्थानीय कार्यकर्ता, नेता तथा प्रतिनिधिहरूको सहभागितामा उम्मेदवार छनोट प्रक्रियालाई टुङ्गयाएको हो । पर्सा निर्वाचन क्षेत्र नम्बर–१ बाट जनमत पार्टी पर्साका जिल्ला अध्यक्ष तथा केन्द्रीय सदस्य ओमप्रकाश सरार्फ र केन्द्रीय सदस्य श्याम प्रसाद गुप्तालाई प्रतिनिधि सभा सदस्यका सम्भावित उम्मेदवारका रूपमा सिफारिस गरिएको छ ।
यसैगरी पर्सा निर्वाचन क्षेत्र नम्बर–२ बाट पार्टीका राष्ट्रिय अध्यक्ष डा. सिके राउतसहित केन्द्रीय सदस्य तथा पूर्व एसएसपी अनुराग द्विवेदी, अधिवक्ता हरिहर प्रसाद साह तथा राष्ट्रिय परिषद् सदस्य बृजकिसोर प्रसाद कलवारलाई उम्मेदवारका रूपमा सिफारिस गरिएको पार्टीले जनाएको छ ।
त्यसैगरी पर्सा निर्वाचन क्षेत्र नम्बर–३ बाट केन्द्रीय सदस्य मालती कुमारी कुशवाहालाई उम्मेदवारका रूपमा सिफारिस गरिएको छ भने पर्सा निर्वाचन क्षेत्र नम्बर–४ बाट केन्द्रीय सदस्य सिमा देवी कलवार (सिमा गुप्ता) उम्मेदवारका रूपमा सिफारिस भएकी छन् ।
जनमत पार्टी पर्साका जिल्ला अध्यक्ष ओमप्रकाश सरार्फका अनुसार क्षेत्रीय बैठकहरू उत्साहजनक रूपमा सम्पन्न भएको भन्दै सिफारिस गरिएका उम्मेदवारहरूले आगामी निर्वाचनमा पार्टीको नीति, विचार र कार्यक्रमलाई सशक्त रूपमा प्रतिनिधित्व गर्ने विश्वास व्यक्त गरिएको छ । साथै पार्टी संगठनलाई थप मजबुत बनाउँदै निर्वाचनमा प्रभावकारी उपस्थिति जनाउने दिशामा जनमत पार्टी पर्सा प्रतिबद्ध रहेको जनाइएको छ । 
प्रतिक्रिया दिनुहोस् !