वीरगंज (पर्सा), २६ मंसिर । अख्तियार दुरुपयोग अनुसन्धान आयोगले नापी कार्यालय पर्साका सर्वेक्षक रामप्रमोद राउत र कार्यालय सहयोगी अरुणप्रसाद उपाध्याय विरुद्ध घुस लिई भ्रष्टाचार गरेको अभियोगमा विशेष अदालत, काठमाडौँमा मुद्दा दायर गरेको छ । सेवाग्राहीसँग एक लाख रुपैयाँ घुस लिएको अवस्थामा पक्राउ परेका दुवै जनामाथि अख्तियारले कानुनी कारबाही अघि बढाएको हो ।
गत मंसिर २ गते अख्तियारको टोलीले दुवै कर्मचारीलाई सेवाग्राहीसँग एक लाख रुपैयाँ घुस लिँदै गरेको अवस्थामा नियन्त्रणमा लिएको थियो । अख्तियारका सहायक प्रवक्ता गणेशबहादुर अधिकारीका अनुसार वीरगंज महानगरपालिका वडा नं. २५ स्थित कित्ता नम्बर ५५, क्षेत्रफल ०००६४ वर्गमिटर जग्गाको ‘छुट जग्गा दर्ता’ प्रक्रिया सहज बनाइदिने नाममा घुस मागी लिएको प्रमाणित भएपछि आरोपपत्र दायर गरिएको हो ।
अख्तियारले दुवै कर्मचारीविरुद्ध भ्रष्टाचार निवारण ऐन, २०५९ को दफा ३(१) बमोजिम बिगो एक लाख कायम गरी सोही रकमअनुसार कैद र जरिवाना मागदाबी गर्दै मुद्दा दायर गरेको छ ।
‘विना पैसा काम नहुने’ नापी कार्यालयको दीर्घकालीन समस्या
नापी कार्यालय पर्सामा लामो समयदेखि ‘पैसा नदिए काम अगाडि नबढ्ने’ प्रवृत्ति मौलाउँदै आएको सेवाग्राहीहरूको गुनासो छ । सामान्य प्रक्रिया पूरा गर्न समेत कर्मचारीले ढिलासुस्ती गर्ने, तर पैसा बुझाएपछि भने भोलिपल्टै काम सकिदिने प्रचलन रहँदै आएको उनीहरूको अनुभव छ ।
विशेषगरी सर्वेक्षक र अमिनहरूको व्यवहारप्रति गुनासो बढी रहेको सेवाग्राहीहरू बताउँछन् । नापजाँच, कित्ता सुधार, जग्गा छुट्ट्याउने, दर्ता प्रक्रियालगायत सेवामा खुलेआम घुसखोरी हुने र पैसा नदिने सेवाग्राहीलाई दिनौँजसो अल्झाइने, फाइल थन्क्याइने र अनावश्यक झन्झट सिर्जना गरिने गरेको उनीहरूको आरोप छ ।
मुद्दा दर्तासँगै सुधारको अपेक्षा
लामो समयदेखि सेवाग्राही पीडित बनाउँदै आएको नापी कार्यालय पर्साका कर्मचारीविरुद्ध अख्तियारले मुद्दा दर्ता गरेपछि अब सेवा प्रवाहमा सुधार आउने अपेक्षा स्थानीयले व्यक्त गरेका छन् । उनीहरूका अनुसार यस घटनाले नापी कार्यालयमा व्याप्त दुर्व्यवहार र घुस प्रथामाथि कडाइ हुँदै जाने विश्वास जागेको छ । 
प्रतिक्रिया दिनुहोस् !