वीरगंज (पर्सा), २२ मंसिर । वीरगंज महानगरपालिकाले वडा नं. २ छपकैयास्थित रेल्वे रोड छेउमा निर्माण गरेको आधुनिक तथा सुविधासम्पन्न थोक तरकारी–फलफूल बजार आइतबारदेखि औपचारिक रूपमा सञ्चालनमा आएको छ । वर्षौंदेखि अव्यवस्थित ढंगले वीरगंज–९ घण्टाघरछेउको विपी उद्यानको खाली जग्गामा सञ्चालन हुँदै आएको थोक बजारलाई व्यवस्थित बनाउन महानगरले नयाँ संरचना तयार पारेको हो ।
करिब ७० लाख रुपैयाँ लागतमा निर्माण गरिएको यो थोक बजारमा २८ वटा सटरसहितको स्थायी संरचना, प्रशस्त गोदाम सुविधा, आधुनिक शौचालय, ढल व्यवस्थापन, खानेपानी तथा विद्युत् सेवा उपलब्ध छन् । सार्वजनिक जग्गामा निर्माण गरिएको बजारले व्यापारीहरूलाई दीर्घकालीन सुरक्षा र सहजीकरण प्रदान गर्ने महानगरको दाबी छ ।
आइतबार मेयर राजेशमान सिंहले विशेष समारोहबीच बजारको उद्घाटन गरे । उनले छपकैयामा थोक तरकारी–फलफूल बजार सञ्चालन हुनु स्थानीयको पहिचानसँग जोडिएको खुशीको विषय रहेको बताए । ‘यो बजारले व्यापारिक गतिविधिलाई व्यवस्थित मात्र होइन, छपकैयाको नामलाई पनि देशभर चिनाउनेछ,’ मेयर सिंहले उद्घाटन समारोहमा भने ।
महानगरका प्रमुख प्रशासकीय अधिकृत अरविन्दलाल कर्णका अनुसार पहिलो चरणमा निर्माण गरिएका १४ युनिटभित्र २८ सटर सञ्चालनमा आएका छन् । बजार परिसरमा सुरक्षा व्यवस्थासहित सबै आधारभूत सेवा उपलब्ध गराइएको उनले बताए । उनका अनुसार महानगरले छपकैयाको बजार क्षेत्रलाई दीर्घकालीन व्यापारिक केन्द्र बनाउने उद्देश्यसहित आगामी चरणमा थप ७० लाख रुपैयाँ लगानी गर्दै भौतिक संरचना र युनिट संख्या विस्तार गर्ने योजना तयार गरेको छ ।
नयाँ थोक बजार सञ्चालनमा आएपछि वर्षौंदेखि संकुचित र अव्यवस्थित स्थानमा व्यवसाय गर्दै आएका व्यापारीलाई सहजता मिल्ने र बजार गतिविधि थप व्यवस्थित हुने अपेक्षा गरिएको छ । 
प्रतिक्रिया दिनुहोस् !