वीरगंज (पर्सा), १७ मंसिर । प्रेस काउन्सिल नेपालका प्रतिनिधि टोलीले बुधबार बाराको विभिन्न कार्यालय तथा प्रकाशन गृहहरूको अनुगमन गरेको छ। टोलीमा काउन्सिलका मुख्य अधिकृत झविन्द्र भुसाल तथा गुनासो सुन्ने अधिकारी एवम् उप–प्रशासकीय अधिकृत राधेश्याम अधिकारी सहभागी थिए ।
अनुगमन टोलीले जिल्ला हुलाक कार्यालय, स्टेसनरी पसल तथा विभिन्न पत्रपत्रिकाका कार्यालयमा पुगेर प्रकाशनको अवस्था, विज्ञापन बोर्ड सूचना, अभिलेख व्यवस्थापन, र साप्ताहिक पत्रपत्रिकाको नियमितताबारे प्रत्यक्ष रूपमा निरीक्षण गरेको हो । साथै बाराबाट प्रकाशित हुने स्थानीय पत्रपत्रिकाको प्रधान कार्यालयहरूमा पुगेर आवश्यक कागजात र प्रकाशन अवस्थाको पनि समीक्षा गरिएको काउन्सिलले जनाएको छ ।
मुख्य अधिकृत भुसालनुसार, हाल बजारमा साप्ताहिक पत्रपत्रिकाहरू कम देखिने, धेरै पत्र–पत्रिका प्रकाशन नगर्ने वा नभेटिने गुनासो बढ्दै गएको छ । सोही गुनासोलाई सम्बोधन गर्न तथा स्थानीय तहमा सञ्चार माध्यमको अवस्था बुझ्न अनुगमन गरिएको उनले बताए ।
अनुगमनका क्रममा स्थानीयवासी तथा सञ्चार क्षेत्रका सरोकारवालाहरूले दैनिक पत्रिका केही उपलब्ध भएपनि साप्ताहिक पत्रिकाहरू पर्याप्त रूपमा नपाइने समस्या बढिरहेको जानकारी दिएका थिए । 
टोलीले अधिकांश पत्रिकाले प्रिन्टलाइनमा कार्यालयको ठेगाना स्पष्ट रूपमा नउल्लेख गरेको पाइएको भन्दै तत्कालै अर्को अंकदेखि ठेगाना स्पष्ट राखेर प्रकाशन गर्न सुझाव दिएको छ । काउन्सिलका अनुसार यसले पारदर्शिता, विश्वसनीयता र जिम्मेवारीका मानकहरू सुनिश्चित गर्न मद्दत गर्दछ ।
त्यसैगरी, बाराका कतिपय पत्रिकाले विज्ञापन प्रकाशनका क्रममा गैर पेशागत आचरण अपनाउने गरेको तथा त्यस सम्बन्धी उजूरीहरू अख्तियार दुरुपयोग अनुसन्धान आयोगमा धेरै पर्ने गरेको देखिएकाले सो विषयमा गम्भीर बन्न प्रेस काउन्सिलले ध्यानाकर्षण गराएको छ ।
अनुगमनका क्रममा पत्रकारिताको आचारसंहिता, स्थानीय प्रकाशनको गुणस्तर र वितरण व्यवस्थाबारे छलफल गर्दै टोलीले नेपाल पत्रकार महासंघ बाराका अध्यक्ष रमेश सुवेदी तथा जिल्ला हुलाक कार्यालय बाराका हुलाक अधिकृत दीपक कुमार पटेलसँग समेत विस्तृत कुराकानी गरेको थियो । 
प्रतिक्रिया दिनुहोस् !