वीरगंज (पर्सा), १६ मंसिर । लैङ्गिक हिंसा विरुद्धको १६ दिने अभियान अन्तर्गत मंगलबार छपकैयास्थित आइडिएल बोर्डिङ स्कूलमा लागुऔषध दुरुपयोग रोकथाम तथा जनचेतनामूलक कार्यक्रम सम्पन्न भएको छ । सामुदायिक प्रहरी सेवा केन्द्र छपकैयाको आयोजनामा तथा आइडिएल बोर्डिङ स्कूलको सहकार्यमा गरिएको कार्यक्रममा स्थानीय तहका जनप्रतिनिधि, शिक्षक–शिक्षिका, अभिभावक, विद्यार्थी तथा सामुदायिक प्रहरी प्रतिनिधिसहित उल्लेख्य संख्यामा सहभागिता रहेको थियो ।
कार्यक्रमका सहभागीहरूलाई लागुऔषध दुरुपयोगका कारण उत्पन्न हुने शारीरिक, मानसिक तथा सामाजिक असर, जोखिम बढाउने तत्व, कानुनी दायित्व तथा त्यसले व्यक्तिको भविष्यमा पार्ने दीर्घकालीन प्रभावबारे विस्तृत जानकारी प्रदान गरिएको थियो । साथै, किशोर–किशोरीलाई लागुऔषध जस्ता गलत अभ्यासबाट जोगाउन परिवार, विद्यालय र समुदायबीचको सहकार्य कति महत्वपूर्ण हुन्छ भन्ने विषयमा पनि विशेष प्रकाश पारिएको थियो ।
सामुदायिक प्रहरी सेवा केन्द्र छपकैयाका अध्यक्ष ग्यासुदिन ठकुराईको अध्यक्षतामा सम्पन्न कार्यक्रममा वडा अध्यक्ष रियाज मिया तेली, वडा सदस्य बसिर मियाँ, स्कूल निर्देशक शौकत अली, प्रिन्सिपल विकास राई लगायत अतिथिहरूको विशेष उपस्थिति रहेको थियो । अतिथी वक्ताहरूले विद्यालय तहमै सुरु गरिने सचेतनामूलक अभ्यासले बालबालिकालाई जोखिमपूर्ण बाटोबाट फर्काउन महत्वपूर्ण भूमिका खेलेको उल्लेख गर्दै निरन्तर आयोजना हुने यस्ता कार्यक्रमहरू समाज परिवर्तनका लागि प्रभावकारी हुने धारणा राखे ।
कार्यक्रममा विद्यार्थी तथा अभिभावकलाई लागुऔषध सम्बन्धी कुनै पनि शंकास्पद गतिविधि देखिएमा तुरुन्तै सम्बन्धित सुरक्षा निकायलाई जानकारी गराउन, सचेत रहन तथा स्वस्थ र सुरक्षित समाज निर्माणमा सक्रिय सहभागिता जनाउन आह्वान गरिएको थियो । समुदाय–विद्यालय सहकार्यमा आयोजित कार्यक्रमले स्थानीय क्षेत्रमा लागुऔषधमुक्त वातावरण निर्माणतर्फ सकारात्मक सन्देश प्रवाह गरेको आयोजकले बताएका छन् । 
प्रतिक्रिया दिनुहोस् !