वीरगंज (पर्सा), १४ मंसिर । लैङ्गिक हिंसाविरुद्धको १६ दिने अभियानका क्रममा नेपाल प्रहरी प्रधान कार्यालयले देशभरका महिला, बालबालिका तथा जेष्ठ नागरिक सेवा केन्द्रहरूमा कार्यरत कर्मचारीहरूलाई मूल्याङ्कन गर्दै उत्कृष्ट प्रहरी घोषणा गरेको छ । सोही क्रममा जिल्ला प्रहरी कार्यालय रौतहटकी प्रहरी सहायक निरीक्षक रागनीकुमारी यादव देशभरकै सर्वोत्कृष्ट सहित प्रथम प्रहरी घोषित भएकी छिन् ।आइतबार आयोजित विशेष समारोहमा प्रहरी महानिरीक्षक (आईजीपी) दानबहादुर कार्कीले रागनीकुमारीलाई नगद ४० हजार रुपैयाँ तथा प्रशंसापत्र प्रदान गर्दै सम्मानित गरे । उनका अनुसार, सेवा केन्द्रमार्फत महिलामाथि हुने हिंसा न्यूनीकरण, पीडित अभिमुख कार्यशैली, समस्या समाधानमा सक्रियता र समुदायसँगको प्रभावकारी सहकार्यको आधारमा उनी सर्वोत्तम मानिएकी हुन् ।
आर्थिक वर्ष २०८१/०८२ को लैंगिक हिंसाको तथ्यपत्र सार्वजनिकीकरण कार्यक्रमको अवसरमा महिला बालबालिका तथा जेष्ठ नागरिक सेवा केन्द्रहरूमा कार्यरत प्रहरी कर्मचारीमध्ये कार्य सम्पादनको आधारमा उत्कृष्ट प्रहरी कर्मचारी छनोट समितिले उनको नाम छनोट गरेको हो । रौतहटको इलाका प्रहरी कार्यालय गरुडामा दरबन्दी भएकी रागनीकुमारी हाल जिल्ला प्रहरी कार्यालय रौतहटमा कार्यरत छिन् । विभिन्न समुदायमुखी गतिविधि, संवेदनशील घटनामा त्वरित हस्तक्षेप तथा पीडितमैत्री सेवामा उनको योगदान उल्लेखनीय रहेको समितिले जनाएको छ ।
द्वितीय र तृतीय स्थानमा हवल्दार खत्री र तामाङ
उत्कृष्ट प्रहरी कर्मचारी छान्ने समितिले दोश्रो स्थानका लागि अर्घाखाँची प्रहरी चौकी बालकोटमा दरबन्दी भई जिल्ला प्रहरी कार्यालय कपिलवस्तुमा कार्यरत प्रहरी हवल्दार शान्ता खत्रीलाई चयन गरेको छ । उनले नगद ३० हजार रुपैयाँ तथा प्रमाण–पत्र प्राप्त गरिन् । तेश्रो स्थानमा परेकी जिल्ला प्रहरी कार्यालय सिन्धुलीकी प्रहरी हवल्दार उमा तामाङलाई प्रहरी प्रधान कार्यालयले नगद २० हजार रुपैयाँ र प्रशंसा पत्र प्रदान गरेको छ ।
सान्त्वना पुरस्कार
यसैगरी, प्रहरी नायब निरीक्षक पूर्णिमा थापा तथा प्रहरी सहायक निरीक्षक साजना प्रसाईंलाई नगद १० हजार रुपैयाँसहित सान्त्वना पुरस्कार प्रदान गरिएको छ । कार्य सम्पादन, पीडितमैत्री सेवा, सूचनामूलक गतिविधि तथा समुदायसँगको सम्बन्ध सुदृढीकरणलाई मुख्य मापदण्ड बनाइएको उत्कृष्ट कर्मचारी छनोटले लैङ्गिक हिंसाविरुद्धको अभियानमा प्रहरीभित्रको प्रतिबद्धता झनै मजबुत बनाएको बताइएको छ ।
प्रतिक्रिया दिनुहोस् !