वीरगंज (पर्सा), ९ मंसिर । पर्सागढी नगरपालिका–३, झबराहास्थित श्री नेपाल राष्ट्रिय आधारभूत विद्यालयलाई रोटरी क्लब अफ सैंबु भैसेपाटीले प्रारम्भिक बालविकास (ईसीडी) सामग्री हस्तान्तरण गरेको छ । विद्यालय सुधार तथा सहयोग कार्यक्रमअन्तर्गत गरिएको उक्त सामग्री हस्तान्तरणबारे क्लबकी सचिव साबित्री पोखरेलले जानकारी दिइन् ।
उनका अनुसार क्लबले विद्यालयमा अध्ययनरत बालबालिकाका लागि ४१ थान चकटी, ४१ जोडी न्यानो लुगा, २४ मिटर कार्पेट, २ थान गलैंचा, ४१ जोडी जुत्ता–मोजा, ४१ थान ब्याग तथा ४१ थान रुमाल प्रदान गरेको हो । क्लबका सदस्यहरूको सक्रियता र सामुदायिक सहयोगभावनाका आधारमा सामग्री व्यवस्थापन गरिएको क्लबले जनाएको छ ।
सहयोग हस्तान्तरण कार्यक्रम विद्यालयका प्रधानाध्यापक राजेन्द्र चौधरीको अध्यक्षता तथा पर्सागढी नगरपालिकाका प्रमुख गोकरण पाठकको प्रमुख आतिथ्यतामा सम्पन्न भएको थियो । कार्यक्रममा रोटरी क्लब अफ सैंबुका अध्यक्ष करणबिर थापा, रोटरी क्लब अफ वीरगंजका सचिव दिनदयाल केडिया सहित स्थानीय अभिभावक, शिक्षक तथा अतिथिहरूको उपस्थिति रहेको थियो । कार्यक्रमको सञ्चालन शिक्षक महादेव चापागाईले गरेका थिए ।
विद्यालयमा अध्ययनरत गरिब, दलित तथा विपन्न परिवारका बालबालिकालाई प्रोत्साहन गर्ने, बालमैत्री शिक्षण वातावरण निर्माण गर्ने र विद्यालयको समग्र शिक्षा स्तर सुधार गर्ने उद्देश्यले सामग्री सहयोग गरिएको क्लबका पदाधिकारीहरूले बताए । उनका अनुसार यस्ता कार्यक्रमले शिक्षा क्षेत्रमा सकारात्मक प्रभाव पार्ने र सामुदायिक संलग्नता बढाउन मद्दत गर्ने विश्वास लिइएको छ ।
प्रतिक्रिया दिनुहोस् !