वीरगंज (पर्सा), ३ मंसिर । सशस्त्र प्रहरी बल नेपाल नम्बर १३ गण हेडक्वार्टर पर्साले बुधबार विभिन्न स्थानमा गरेको कारवाहीको क्रममा भन्सार छली गरी ल्याइँदै गरेका करिब ३९ लाख १० हजार ६४० रुपैयाँ बराबरको सामान र नगद बरामद गरी वीरगंज भन्सार कार्यालयमा बुझाएको छ । सोही दिन २ लाख ७० हजार रुपैयाँ बराबरका पाँच हजार चार सय ब्रोइलर कुखुराका चल्ला समेत नष्ट गरिएको सशस्त्र प्रहरीले जनाएको छ ।
सीमा सुरक्षा गुल्म अलौंबाट खटिएको टोलीले विन्दवासिनी गाउँपालिका–३, झौवाबाट वीरगंजतर्फ आउँदै गरेको ना. ४ च ६९३५ नम्बरको पिकअप गाडी नियन्त्रणमा लिई २७ लाख १३ हजार ९४० रुपैयाँ बराबरको कपडा बरामद गरेको हो । त्यस्तै २ लाख २२ हजार १०० रुपैयाँ बराबरको मोटरसाइकल तथा पार्टपुर्जा समेत बरामद गरी गाडी सहित भन्सार बुझाइएको छ ।
यसैगरी नम्बर १३ गणबाट खटिएको अर्को टोलीले वीरगंज महानगरपालिका–२२, जगरनाथपुर क्षेत्रमा भारततर्फबाट टाउकोमा बोकेर परवानीपुरतर्फ ल्याइँदै गरेका २ लाख ५४ हजार ६०० रुपैयाँ बराबरका कपडा र इलेक्ट्रोनिक सामान नियन्त्रणमा लिएको छ ।
उता, सीमा सुरक्षा गुल्म अलौं र गुल्म वीरगंजको संयुक्त टोलीले भन्सार मेनगेट, वीरगंज–१६ मा विशेष सूचनाका आधारमा बी.आर. ०५ ए.भी. ५९८३ नम्बरको मोटरसाइकल चेकजाँच गर्दा चालकले हेलमेटभित्र लुकाएर ल्याएको ३ लाख रुपैयाँ नगद बरामद गरेको छ । सो मोटरसाइकल (बराबर १ लाख ५० हजार रुपैयाँ) र चालकलाई समेत नियन्त्रणमा लिइएर भन्सार बुझाइएको हो । पक्राउ परेका चालक भारतको पूर्वी चम्पारण, नुनियाडीह पञ्चायत–९, रक्सौल निवासी २५ वर्षीय आनन्द कुमार भएको सशस्त्र प्रहरीले पुष्टि गरेको छ ।
त्यस्तै, बोर्डर आउटपोस्ट अमरपट्टीबाट खटिएको टोलीले विन्दवासिनी गाउँपालिका–३, छठियाघाट नजिकै भारतबाट अवैध रूपमा ल्याइँदै गरेका ५ हजार ४ सय ब्रोइलर कुखुराका चल्ला नियन्त्रणमा लिएर नियम अनुसार नष्ट गरेको छ । बरामद चल्लाको मूल्य २ लाख ७० हजार रुपैयाँ अनुमान गरिएको छ । सम्पूर्ण कारबाहीहरू सशस्त्र प्रहरी नायब उपरीक्षक विश्वराज योन्जनको संयोजन तथा कमान्डमा सम्पन्न भएको सशस्त्र प्रहरी बल नेपाल नम्बर १३ गण हेडक्वार्टर पर्साले जनाएको छ ।
प्रतिक्रिया दिनुहोस् !