वीरगंज (पर्सा), ३ मंसिर । पर्साका प्रमुख जिल्ला अधिकारी (सीडीओ) भोला दाहालले जिल्लास्थित गैर–सरकारी संस्थाहरूसँगको समन्वयलाई सुदृढ गर्दै विकासका काममा साझा रूपमा अघि बढ्ने प्रतिबद्धता जनाएका छन् । दाहालले पर्सामा सञ्चालित सामाजिक कार्यक्रमहरू प्रभावकारी नतिजामा पुर्याउन सरकारी तथा गैर–सरकारी निकायबीचको स्पष्ट समन्वय अपरिहार्य भएको उल्लेख गरे ।
गैर सरकारी संस्था महासंघ नेपाल, पर्साद्वारा आयोजित परिचयात्मक तथा समसामयिक विषयमा केन्द्रित छलफल कार्यक्रम महासंघका अध्यक्ष छठु साहको अध्यक्षतामा सम्पन्न भयो । कार्यक्रममा जिल्लामा क्रियाशील संस्थाका प्रतिनिधिहरूले स्थानीय तहमा सञ्चालन भइरहेका गतिविधि, देखिएका प्रशासनिक तथा प्राविधिक अवरोध, सहकार्यका आवश्यकता र आगामी प्राथमिकताबारे स्पष्ट धारणा राखे । कार्यक्रमको सुरुवातमा महासंघका अध्यक्ष साहले सीडीओ दाहाललाई गम्छा र दोसल्लाले सम्मानपूर्वक स्वागत गरे । साहले पर्सामा गैर–सरकारी संस्थाहरूको उपस्थिति व्यापक भएको उल्लेख गर्दै, साझा राष्ट्रिय तथा स्थानीय लक्ष्य पूरा गर्न सरकारी संयन्त्रसँगको नियमित संवाद अत्यावश्यक रहेको औँल्याए ।
छलफलमा एनजिओसिसिका इब्राहीम देवान, विजामका नीरज साह, दिडायर्सीकी सालमा खातुन, सानो पाइला नेपालका रौनक सराफ, किरण गुप्ता, त्रिनेत्रका चन्देश चौहान, दलित उत्थानकी निला रामसहित विभिन्न संस्थाका प्रतिनिधिहरू सहभागी थिए । उनीहरूले आफ्ना कार्यक्रमको प्रभावकारिता, स्थानीय समन्वयमा देखिएका कमजोर पक्ष र सुधारका बुँदाहरू उठाएका थिए ।
प्रमुख जिल्ला अधिकारी दाहालले सहभागीहरूका सुझाव सुनेपछि प्रशासन संस्थाहरूबीचको सहकार्य व्यवस्थित गर्न तयार रहेको प्रतिबद्धता जनाए । उनका अनुसार, संस्थाहरूले सञ्चालन गर्ने कार्यक्रमहरूको पारदर्शिता, नियमित विवरणसमेत प्रशासनलाई उपलब्ध गराएमा संयुक्त रूपमा परिणाममुखी काम अगाडि बढाउन सहज हुने बताए । 
प्रतिक्रिया दिनुहोस् !