वीरगंज (पर्सा), २ मंसिर । नेपाल सरकारका खानेपानी मन्त्री प्रदीप यादवको निर्देशनमा वीरगञ्जको नारायणी क्रिकेट मैदानमा अति आवश्यक डिप बोरिङ कार्य सफलतापूर्वक सम्पन्न भएको छ । पानीको व्यवस्थापन नहुँदा खेलाडीहरूलाई नियमित अभ्यास र प्रतियोगिता सञ्चालनमा समस्या हुँदै आएकोमा यो परियोजनाले दीर्घकालीन समाधान प्रदान गर्ने विश्वास लिइएको छ ।
नारायणी क्रिकेट मैदानमा पानीको अभावले खेलाडीहरूलाई पीने पानी, मैदान सिँचाइ, र अन्य व्यवस्थापनमा गम्भीर कठिनाइ झेल्न बाध्य बनाएको थियो । अब डिप बोरिङको सफलताले मैदानमा आवश्यक पानीको आपूर्ति सुनिश्चित गरेको छ । डिप बोरिङ जडान पश्चात् मन्त्री यादवले खेलकुद विकास र स्थानीय युवाको प्रोत्साहन आफ्नो प्राथमिकता भएको बताउनुभयो । “नारायणी क्रिकेट मैदानमा डिप बोरिङको सफलताले खेलाडीहरूको समस्या समाधान गर्न सहयोग पुगेको छ । अब खेलाडीहरूले खेलमा मात्र ध्यान केन्द्रित गर्न सक्नेछन् । भविष्यमा थप पूर्वाधार विकास गर्दै मैदानको व्यवस्थापनलाई अझै प्रभावकारी बनाइनेछ,“मन्त्री यादवले भन्नुभयो ।
मन्त्री यादवले मैदानमा पानी वितरणका लागि थप पाइपलाइन र भण्डारण संरचना निर्माण जस्ता आवश्यक कामहरू अघि बढाइने जानकारी पनि दिनुभएको छ । पर्सा क्रिकेट सङ्घका अध्यक्ष मनिष सिंहले डिप बोरिङ जडान कार्य सम्पन्न भएकोमा खुसी व्यक्त गर्दै भन्नुभयो, “डिप बोरिङले मैदानको पानी समस्या दीर्घकालीन रूपमा समाधान गरिदिएको छ । यसले खेलाडीहरूको अभ्यासलाई सहज बनाउनुका साथै आगामी प्रतियोगिता सञ्चालनलाई सरल बनाउनेछ । यो कदम स्थानीय खेलकुद विकासका लागि महत्त्वपूणर् उदाहरण बनेको छ ।“ डिप बोरिङ जडानको यस कदमले नारायणी क्रिकेट मैदानमा हुने खेल गतिविधिहरूलाई थप प्रभावकारी बनाउने अपेक्षा गरिएको छ । खेलाडी, प्रशिक्षक, र खेल प्रेमीहरूको उत्साह यसले बढाएको छ ।
खानेपानी मन्त्री प्रदीप यादवले खेलकुद र स्थानीय पूर्वाधार विकासमा यस्तै सकारात्मक पहलहरूलाई निरन्तरता दिने प्रतिबद्धता व्यक्त गर्नुभएको छ ।
प्रतिक्रिया दिनुहोस् !