मलंगवा (सर्लाही), १२ कात्तिक । सर्लाही जिल्लाको सिमावर्ती क्षेत्रमा प्रवेश गरि भारतीय नागरिकको घाँटी छिनाई हत्या गरि विगत ५ महिनादेखि फरार रहेका अर्का भारतीय नागरिकलाई सर्लाही प्रहरीले पक्राउ गर्न सफल भएको छ । पक्राउ पर्नेमा भारत, बिहार राज्य, जिल्ला सितामढी, थाना सोनवर्षा, ग्रामपञ्चायत पुरनदाहा राजवाडा बस्ने राजन राय भन्ने राजनन्दन रायको २६ वर्षीय छोरा धर्मेन्द्र राय रहेका छन् ।
रायले गत वैशाख २६ गते सर्लाही हरिपुर्वा न.पा.वडा नं.०१ स्थित अनरजित महराको खेतमा भारतीय नागरिक अन्दाजी २६ वर्षीय शेखर सुमन भन्ने सिकु कुमारलाई धारिलो हतियारले घाँटी छिनाई काटी हत्या गरि फरार रहेका थिए । फरार रायलाई पक्राउ गर्न सर्लाही जिल्ला अदालतबाट जेठ ११ गते प्राप्त भए पश्चात जिल्ला प्रहरी कार्यालय सर्लाहीमा कार्यरत प्रहरी नायब निरीक्षक सुभाष यादवको नेतृत्वमा खटिएको प्रहरीले नेपाल भारत सीमा नजिक क्षेत्रबाट रायलाई पक्राउ गर्न सफल भएको हो ।
हत्यामा संलग्न अभियुक्तहरुलाई खोजतलास गर्ने क्रममा सर्लाही प्रहरीले धर्मेन्द्र रायलाई सर्लाहीको मलंगवा नगरपालिका वडा नं. ८ स्थित नेपाल-भारत सिमा नजिक गोरखकाली सडक खण्डबाट बेलुकी करिब ७ बजेको समयमा फेला पारी पक्राउ गरेको हो । प्रहरीले पक्राउ गरेको रायलाई थप अनुसन्धानको लागि सम्मानित सर्लाही जिल्ला अदालतबाट ५ दिनको म्याद अनुमति लिई थप अनुसन्धान गरि रहेको जिल्ला प्रहरी कार्यालय सर्लाहीले जनाएको छ । 
प्रतिक्रिया दिनुहोस् !