वीरगंज (पर्सा), ९ असोज । नेपाली कांग्रेसका सभापति शेरबहादुर देउवाले काँग्रेसको काँधमा देश हाँक्ने अवसर पाए सफलतापूर्वक जिम्मेवारी निर्वाह गर्ने बताएका छन् । वीरगंज-२४ रामगढवा स्थित नव निर्मित ‘आत्माराम ओझा-दुखा सहनी स्मृत्ति भवन’ को उद्घाटन समारोहलाई सम्बोधन गर्दै सभापति देउवाले विगतमा पनि सरकार हाँक्ने जिम्मेवारी सफलतापूर्वक निर्वाह गरेको र आउने दिनमा पनि सफलतापूर्वक निर्वाह गर्ने बताए ।
उनले पर्सा जिल्ला देशकै महत्वपूर्ण जिल्ला भएको भन्दै राणा र पञ्चायत विरुद्ध कांग्रेसले गरेको सशस्त्र संघर्ष पर्साको वीरगंजबाटै सुरु भएको स्मरण गराए । राणा र पञ्चायतविरुद्ध काँग्रेसले गरेको सशस्त्र संघर्षको बिगुल वीरगंजबाटै फुकिएको बताए । आर्थिक र राजनीतिक दृष्टिकोणले पर्सा जिल्ला ऐतिहासिक जिल्ला रहेको भन्दै सभापति देउवाले देशको अर्थतन्त्र धान्नेमा पनि पर्साकै महत्वपूणर् योगदान रहेको बताए ।
कार्यक्रममा संघीय मामिला तथा कानुन मन्त्री अजय चौरसियाले मुलुकमा लोकतन्त्र स्थापनामा नेपाली काँग्रेसको महत्वपूर्ण योगदान रहेको बताए । उनले नेपाली काँग्रेसका नेताहरुको नेतृत्वमा लोकतन्त्र पुनरबहालीको लागि पटक पटक आन्दोलन भएको बताउँदै देशको लोकतन्त्रमाथि पटक पटक आक्रमण भएको छ, नेपाली काँग्रेसमाथि आक्रमण भएको छ, तर जति आक्रमण भएको छ, त्यति नै नेपाली काँग्रैस सशक्त भएर अगाडि बढेको बताए । 
काँग्रेस पार्टीका सहिदहरुको सहादत र आन्दोलनको जगबाट बनेको नेपाली काँगेस पार्टीलाई कुनैपनि शक्तिले सिध्यान नसक्ने बताए । लोकतन्त्र स्थापनाको लागि नेपाली काँग्रेस पार्टीले ५० औं वर्ष संघर्ष गरेको भन्दै मन्त्री चौरसियाले पार्टी भित्रका तीतामिठा कुराहरुलाई बिर्सिएर एकजुट भएर अगाडि बढे मधेश सहित तीनै तहमा काँग्रेस पार्टीको सरकार स्थापना हुने बताए ।
त्यसैगरि कार्यक्रममा नेपाली काँग्रेसका सह-महामन्त्री रमेश रिजालले मुलुकमा आर्थिक समृद्धि अहिलेको मुख्य चुनौति रहेको बताए । राजनीतिमा सफलता पाएपनि आर्थिक समृद्धिका लागि शिक्षामा सुधार, गरिबीको अन्त्यका लागि हाम्रो मुख्य लडाई रहेको भन्दै रिजालले मुलुकमा आर्थिक समृद्धिको लागि अझै सशक्त भएर अगाडि बढ्नुपर्ने बताए । संविधान संशोधन नेपाली काँग्रेसको मुख्य एजेण्डा रहेको भन्दै रिजालले नयाँ पुस्तालाई जिम्मेवारी सुम्पिनुपर्ने अवस्था पनि आएको बताए ।
मुलुकलाई आर्थिक समृद्धितर्फ लैजान नयाँ पुस्ताको काँधमा जिम्मेवारी सुम्पिनु आवश्यक रहेको भन्दै रिजालले नयाँ पुस्ताका नेताहरुलाई सशक्त रुपमा नयाँ विचार सहित अगाडि बढन आग्रह गरे । नेपाली काँग्रेसका क्षेत्रीय सभापति जनाद्र्धन सिंह क्षेत्रीको सभापतित्वमा आयोजित कार्यक्रममा नेपाली काँग्रेसका नेताहरु फर्मुल्ला मन्सुर, शंकर चौधरी, श्याम पटेल लगायतले मन्तव्य व्यक्त गरेका थिए ।
प्रतिक्रिया दिनुहोस् !