वीरगंज (पर्सा), १७ असोज / वीरगंज स्थित भारतीय महावाणिज्य दुतावासले भारतको ७५ औं स्वतन्त्रता दिवस एवं महात्मा गान्धीको १५३ औँ जन्मजयन्तीको अवसरमा विविध कार्यक्रमको आयोजना गरेको छ । महावाणिज्य दूतावासको प्राङ्गणमा आयोजित विविध कार्यक्रमहरुमा उद्योगी, व्यवसायी, सञ्चारकर्मी, नागरिक समाजका अगुवा, बुद्धिजिवी, शिक्षक विद्यार्थी लगायत ८० जना भन्दा बढिको उल्लेख्य उपस्थिति रहेको थियो ।
कार्यक्रममा सहभागी विद्यार्थीहरुले महात्मा गान्धीको मनपर्ने भजन “रघुपति राघव राजा राम” गाएर कार्यक्रमको उद्घाटन गरिएको थियो । त्यसपछि विभिन्न विद्यालयका करिब ११ जना विद्यार्थीले महात्मा गान्धीसँग सम्बन्धित विभिन्न विषयमा छोटो भाषण प्रस्तुत गरेका थिए ।
कार्यक्रममा बिहारको पूर्वी चम्पारण जिल्ला रक्सौलमा स्थित लिटिल फ्लावर कुष्ठरोग केन्द्रका सदस्यहरुद्वारा चरखा प्रयोग गर्ने तरिका पनि प्रर्दर्शन गरिएको थियो । कार्यक्रमबीच महावाणिज्य दूतावासद्वारा सहभागीहरुलाई गान्धी टोपी समेत वितरण गरिएको थियो । कार्यक्रमको विशिष्ट अतिथि नेपालका वरिष्ठ पत्रकार तथा स्तम्भकार चन्द्रकिशोर झाले महात्मा गान्धीको काम र कार्यबारे प्रकाश पारेका थिए । उनले नेपाल सहित विश्वका विभिन्न भागमा भएको स्वतन्त्रता संघर्षमा महात्मा गान्धीको प्रभावलाई जोड दिएका थिए । उनले २० औं शताब्दीमा महात्मा गान्धीले प्रतिपादन गरेका “सत्य, अहिंसा र सत्याग्रह” को सिद्धान्त अझै पनि विश्वका लागि सान्दर्भिक रहेको बताएका थिए ।
कार्यक्रममा महावाणिज्य दुतावासका कन्सुल नितेश कुमारले आफ्नो टिप्पणीमा राष्ट्र निर्माणमा महात्मा गान्धीको भूमिकाबारे प्रकाश पारेका थिए । द्वन्द्व, युद्ध र महामारीले नकरात्मक प्रभाव पारेको आजको विश्वमा महात्मा गान्धीले देखाएको बाटो निकै सान्दर्भिक रहेको बताए । उनले महात्मा गान्धीसँगै एकै दिन जन्मदिन मनाउने लालबहादुर शास्त्रीको योगदानबारे पनि स्मरण गराएका थिए । शास्त्री जी सादगी, नम्रता र उच्च नैतिक मूल्यवान व्यक्ति थिए ।
प्रतिक्रिया दिनुहोस् !