वीरगन्ज (पर्सा), ७ असार / नापी कार्यालय पर्सा, वीरगंजका एक जना बिचौलिया एक लाख २५ हजार घुसको रकमसहित रंगे हात पक्राउ परेका छन् । निजामति कर्मचारीको पोशाक लगाएका नापी कार्यालय पर्सामा कार्यरत रहेको बताउँदै सेवाग्राहीसँग अवैध रकम लिदै आएको वीरगंज १३ मुर्ली निवासी ६० बर्षिय दिनेश पाण्डे भनिने उमा पाण्डे प्रकाउ परेका हुन् । वडा प्रहरी कार्यालय विर्ताका प्रहरी निरिक्षक विशाल मल्ल नेतृत्वको प्रहरी टोलीले वीरगंजको आदर्शनगरस्थित एभरेष्ट बैंक भित्रबाट सेवाग्राहीसँग १ लाख २५ हजार नगद रुपैया लिदै गरेको अवस्थामा रंगे हात पक्राउ गरेको हो ।
वीरगंज महानगरपालिका वडा नम्बर १५ लक्ष्मणवा निवासी राजनारायण झालाई नयाँ नापीको लालपुर्जा उपलब्ध गराउने भन्दै ३ महिनादेखि अनावश्यक नापी कार्यालयमा दौडाउदै आई रहेका पाण्डेले लालपुर्जा लिन मंगलबार अपरान्ह ३ बजे बोलाएको थियो । लाल पुर्जा दिनु अघि काम गराइदिनको लागि पाण्डेले माग गरेको १ लाख ५० हजार मध्ये वाकी १ लाख २५ हजार लिन आदर्शनगरस्थित एभरेष्ट बैंकमा पुगेका थिए । सेवाग्राही झाले बैंकबाट रकम झिकी पाण्डेलाई बुझाउने क्रममा निजलाई रंगेहात प्रहरीले पक्राउ गरेको जिल्ला प्रहरी कार्यालय पर्साका प्रहरी उपरीक्षक रमेश बस्नेतले जानकारी दिए । पक्राउ परेका पाण्डे विरुद्ध ठगी कसुरमा कारवाही अगाडी बढाईने प्रहरी उपरीक्षक बस्नेतले बताए ।
नापी कार्यालयका प्रमुख नारायण श्रेष्ठले घुसको रकमसहित पक्राउ परेका पाण्डेलाई आफु नचिनेको बताए पनि उनी बर्षाैदेखि नापी कार्यालयको दोश्रो तल्लामा बस्दै आएका छन् । पाण्डे कार्यालयको टेबल कुर्सी मै बसेर कार्यालयको काम गर्दै आएको प्रत्यदर्शी सेवाग्राहीहरुले वताएका छन् । सेवाग्राहीका अनुसार सरकारी कर्मचारी पोशाक समेत लगाएर बस्ने गरेको पाण्डे सेवाग्राहीसंग विभिन्न काम गराइिदने भन्दै अवैध रकम असुल्दै आएका थिए । सो रकमबाट नापी कार्यालयका प्रमुख नारायण श्रेष्ठ सम्म समेत पुग्ने गरेको स्रोतले जनाएको छ । घटनास्थल पुगेको संचारकर्मीहरुको टोली घटना बारे बुझ्न नापी कार्यालयमा पुगेपछि कर्मचारीहरुले पिडितको लालपुर्जा तत्काल उपलब्ध गराएका थिए ।
प्रतिक्रिया दिनुहोस् !