• हरिशंकर शर्मा
वीरगन्ज, ३० वैशाख / स्थानीय तहको निर्वाचन अन्तर्गत शुक्रबार भएको मतदान पर्सा जिल्लामा शान्तिपूर्ण तरिकाले सम्पन्न भएको छ । पर्साको १४ वटा स्थानीय तहमध्ये छिपहरमाई गाउँपालिका पोखरीया नगरपालिका तथा बहुदरमाई नगरपालिका बाहेक अन्य पालिकामा शान्तिपूर्ण तरिकाले निर्वाचन सम्पन्न भएको हो । वीरगन्ज महानगरपालिकाको ३२ वटा वडामध्ये ३ नम्बर वडाको मालपोत कार्यालय स्थित मतदान केन्द्रमा सामान्य विवाद भएको थियो भने जिराभवानी गाउँपालिका, पोखरीया नगरपालिकामा पनि विवाद भएको थियो ।
वीरगन्ज महानगरपालिकामा ५५ वटा मतदान स्थलमा १ सय ४३ वटा मतदान केन्द्र तोकिएकोमा वीरगन्ज महानगरपालिका वडा नं. ३ मालपोत कार्यालयमा रहेको मतदान केन्द्रमा सामान्य विवाद भएको थियो । जसपाबाट महिला सदस्यका उम्मेदवार बरकतुन नेसाले मतदातासँगै गएर मत खसाल्न लगाएको भन्दै नेपाली काँग्रेसका सदस्य उम्मेदवार तनवीर अन्सारीले विरोध गरेपछि विवाद उत्पन्न भएको थियो । विवादलाई तत्कालै त्यहाँ खटेका नेपाल प्रहरी तथा सशस्त्र प्रहरीले साम्य पारेको थियो ।
शुक्रबार भएको मतदानमा वीरगन्ज महानगरपालिकामा करिब ७० प्रतिशत मात्रै मत खसेको छ । वीरगन्ज महानगरपालिकामा कुल १ लाख २४ हजार ६ सय ४७ जना मतदातामध्ये ९४ हजार ३ सय २४ जनाले मतदान गरेका छन् । स्थानीय तह निर्वाचनका लागि बनाइएको थियो । महानगरको मतगणनाका लागि मुख्य निर्वाचन अधिकृतको कार्यालयले वीरगन्ज – १४ पिपरा स्थित नृसिंह माविको भवनलाई मतगणनास्थल तोकेको छ । मतगणना गरिने कोठाहरुमा ८ फिट अग्लो तार जाली सहितको बार लगाइएको छ ।
यस्तै निर्वाचन आयोगको निर्देशन अनुसार मतगणना हुने र मतपेटिका भण्डार गर्ने सबै कोठाहरुमा गरि कुल ८ वटा सिसिटिभी क्यामेरा जडान गरिएको छ । ३२ वटा वडा रहेको महानगरको मतगणनाका लागि निर्वाचन कार्यालयका तर्फबाट प्रत्येक कोठामा ६÷६ जना गरि जम्मा २४ जना गणक खटाइने बताइएको छ । पर्सा जिल्लामा १ लाख ९१ हजार ५ सय ३७ जना पुरुष तथा १ लाख ४८ हजार २ सय ८३ महिला तथा अन्य १६ जना गरि जम्मा ३ लाख ३९ हजार ८ सय ३६ जना मतदाताहरु रहेका छन् ।
छिपहरमाई गाउँपालिका स्थित मतदान केन्द्रमा विवाद
छिपहरमाई गाउँपालिका वडा नं. १ महादेव माध्यमिक विद्यालय मिर्जापुर मतदान केन्द्रमा नेकपा एमाले तथा जसपाका कार्यकर्ताबीच झडप भएपछि विवाद उत्पन्न भएको थियो । नेकपा एमालेका सचिव समेत रहेको निवर्तमान मेयर तथा गाउँपालिकाका मेयरका उम्मेदवार मनोज गुप्ताले मतदान केन्द्रको अनुगमन गर्न जाने क्रममा जसपाका कार्यकर्ताहरुले विवाद गरेपछि दुबै पक्षबीच झडप भएको थियो ।
झडपलाई नियन्त्रण गर्नका लागि प्रहरीले ६ राउण्ड आश्रु ग्याँस समेत प्रहार गरेको थियो । विवाद भई झडप भएपनि सुरक्षाकर्मीले स्थितिलाई नियन्त्रणमा लिएर निर्वाचन सम्पन्न गराएको थियो । विवादको क्रममा उनीहरुले निर्वाचन रद्द गर्नुपर्ने माग समेत गरेका थिए ।
वर्षाले ठोरी गाउँपालिमा केहीबेर मतदान प्रभावित
मौसम पूर्वानुमान महाशाखाले जानकारी गराएअनुसार पूर्व तयारी नगरेले वर्षाको कारण ठोरीमा केहीबेर मतदान प्रभावित बनेको थियो । मतदान स्थलको उचित व्यवस्थापन नगरेको कारण वर्षा हुन थालेपछि केहीबेर मतदान रोकिएको थियो भने वर्षा बन्द भएपछि पुनः मतदान सुचारु भएको थियो ।
मतदान अधिकृतले धाँधली गरेको भन्दै पोखरीयामा पनि विवाद
मतदान केन्द्रमा मतदान अधिकृतले नै धाँधली गरेको भन्दै पोखरीया नगरपालिका वडा नम्बर १ बनकटवा विवाद भएको छ । बनकटवा स्थित राधाकृष्ण प्रा.वि. मतदान केन्द्रको मतपेटिकामा मतदान अधिकृतले रेजा लगाएको भन्दा बढि संख्यामा मतपत्र खसेको भेटिएपछि विवाद भएको हो ।
मतदान अधिकृत चन्देश्वर चौहानले कुल ५ सय ८८ वटा मतपत्रमा रेजा लगाएको तर मतपेटिकामा भने ६ सय २ वटा मतपत्र खसेको भेटिएपछि नेपाली काँग्रेसका नेता तथा कार्यकर्ताहरुले विरोध गरेका थिए । मतदान अधिकृतले रेजा लगाएको संख्या भन्दा १४ वटा बढि मतपत्र, मतपेटिकामा खसेको भेटिएपछि त्यहा शुक्रबार भएको मतदान रद्द गरि पुनः अर्को निर्वाचन गर्नुपर्ने उनीहरुले माग गरेका छन् ।
मतदान केन्द्रमा सञ्चारकर्मीलाई रोक
पर्सा जिल्ला स्थित मतदान केन्द्रहरुमा सञ्चारकर्मीहरुलाई तस्विर तथा भिडियो लिनमा रोक लगाइएको थियो । अधिकाँश मतदान केन्द्रमा खटेका सुरक्षाकर्मीहरुले सञ्चारकर्मीहरुलाई टाँढै तथा बाहिरबाट नै तस्विर लिन लगाएका थिए । सञ्चारकर्मीहरुलाई तस्विर तथा भिडियो खिच्नमा प्रहरीले रोक लगाएपनि विभिन्न सामाजिक सञ्जालमा मतदाताहरुको फोटो तथा भिडियो सार्वजनिक भएपछि पर्सेली सञ्चारकर्मीहरुले सामाजिक सञ्जाल मार्फत विरोध समेत जनाएका छन् ।
प्रतिक्रिया दिनुहोस् !