जितपुरसिमरा (बारा), १३ कात्तिक । वर्षौंदेखि जग्गामा बसोबास गर्दै आए पनि कानुनी स्वामित्वबाट वञ्चित बाराको जितपुरसिमरा उपमहानगरपालिका–१४ का ५७९ परिवारले लालपुर्जा पाउने प्रक्रिया अघि बढेको छ । उपमहानगरपालिकाले उनीहरूको आवश्यक कागजातसहितको फाइल नापी तथा मालपोत कार्यालय कलैयामा बुझाएको छ ।
उपमहानगरपालिकाको भूमि व्यवस्था तथा सहकारी शाखा र राजस्व शाखाका प्रतिनिधिसहित वडाध्यक्ष चयन गुरुङको टोलीले बिहीबार कार्यालयका कर्मचारी मनोहर मिश्रालाई लाभग्राहीका फाइल हस्तान्तरण गरेको हो । उपमहानगरपालिकाको ७१औँ कार्यपालिका बैठकको निर्णयअनुसार भूमिसम्बन्धी समस्या समाधानका लागि विवरण बुझाइएको वडाध्यक्ष गुरुङले जानकारी दिए । उनका अनुसार फाइल बुझाइएका ५७९ जनामध्ये १४ जना भूमिहीन दलित, १३६ जना भूमिहीन सुकुम्बासी र ४२९ जना अव्यवस्थित बसोबासी छन् ।
यसअघि उपमहानगरपालिकाका वडा नम्बर १, २, १८ र २१ का लाभग्राहीको विवरण पनि सम्बन्धित कार्यालयमा बुझाइसकिएको छ । वडा नम्बर १४ को प्रक्रिया अघि बढेसँगै अब उपमहानगरपालिकाका पाँचवटा वडाका भूमिहीन तथा अव्यवस्थित बसोबासी लालपुर्जा प्राप्त गर्ने प्रक्रियामा पुगेका छन् ।
वर्षौंदेखि बसोबास गरेको जग्गाको कानुनी प्रमाण नहुँदा विभिन्न समस्या झेल्दै आएका परिवारका लागि यो कदमले स्वामित्व प्राप्तिको बाटो खोलेको छ । तर, फाइल हस्तान्तरण हुँदैमा लालपुर्जा सुनिश्चित हुने अवस्था भने होइन । सम्बन्धित निकायबाट जग्गाको विवरण, कागजात तथा अन्य कानुनी पक्षको जाँचबुझपछि मात्रै स्वामित्व हस्तान्तरणको प्रक्रिया टुंगिनेछ ।
वडाध्यक्ष गुरुङले लाभग्राहीलाई जग्गाको कानुनी स्वामित्व दिलाउन नापी तथा मालपोत कार्यालयसँग समन्वय भइरहेको बताउँदै आवश्यक प्रक्रिया शीघ्र पूरा गराउन पहल गरिने जनाए । लामो समयदेखि जग्गाको स्वामित्वको प्रतीक्षामा रहेका लाभग्राहीले पनि जाँचबुझ र कानुनी प्रक्रिया छिटो टुंग्याएर लालपुर्जा वितरण गर्न माग गरेका छन् । 
प्रतिक्रिया दिनुहोस् !