वीरगंज (पर्सा), १० कात्तिक । विद्यार्थीलाई संविधान, मौलिक हक र कानुनी व्यवस्थाबारे व्यावहारिक ज्ञान दिँदै अधिकार तथा कर्तव्यप्रति सचेत बनाउने उद्देश्यले सञ्चालन हुँदै आएको ‘लिगल भ्वाइस क्याम्पेन’को चौथो संस्करण पर्सा जिल्लाबाट सुरु भएको छ । तराई मधेश कानून विद्यार्थी समाज (Terai Madhesh Law Students Society–TMLSS) ले सञ्चालन गरेको अभियानको पहिलो दिन चार विद्यालयका २५० भन्दा बढी विद्यार्थी लाभान्वित भएका छन् ।
मधेश प्रदेश तथा तराईका विभिन्न जिल्लामा विगत चार वर्षदेखि सञ्चालन हुँदै आएको अभियानअन्तर्गत पर्सामा कात्तिक ९ गतेदेखि कानुनी सचेतनामूलक कार्यक्रम सुरु गरिएको हो । विद्यार्थीलाई कानुनका सैद्धान्तिक विषयमा मात्र सीमित नराखी दैनिक जीवनमा कानुनी ज्ञानको उपयोग गर्न सक्षम बनाउने अभियानको लक्ष्य रहेको छ ।
अभियानको पहिलो दिन टिम पर्साले जिल्लाका चार विद्यालयमा छवटा कानुनी सचेतना सत्र सञ्चालन गरेको थियो । साउथजोन सेकेन्डरी स्कुलमा तीनवटा सत्र सञ्चालन गरिएको थियो भने गोल्डेन फ्युचर सेकेन्डरी स्कुल, हिमालयन पिरामिड सेकेन्डरी स्कुल र मेरिगोल्ड सेकेन्डरी स्कुलमा एक–एकवटा सत्र आयोजना गरिएको थियो ।
पहिलो दिनको कार्यक्रममा २५० भन्दा बढी विद्यार्थीलाई कानुनी सचेतना प्रदान गरिएको टिम पर्साका संयोजक रवि मिश्रले जानकारी दिए । कार्यक्रममा टिमका स्रोत व्यक्ति रवि मिश्र, किरण गुप्ता, आदर्श गुप्ता, अलोक शर्मा, जय गुप्ता, सुरज शाह, रोशन यादव र प्रियंका शाहले सहजीकरण गरेका थिए ।
अभियानमार्फत विद्यार्थीलाई नेपालको संविधान, मौलिक हक, प्रचलित कानुनी प्रावधान तथा नागरिकका अधिकार र कर्तव्यबारे जानकारी प्रदान गरिँदै आएको छ । यसका साथै विद्यार्थीको क्षमता अभिवृद्धि, नेतृत्व विकास, संसदीय अभ्यास र लोकतान्त्रिक प्रक्रियाबारे व्यावहारिक ज्ञान दिलाउने विषयलाई पनि प्राथमिकतामा राखिएको छ ।
कानुनी शिक्षा पाठ्यपुस्तकमा सीमित नराखी विद्यार्थीलाई आफ्ना अधिकार पहिचान गर्न, कानुनी दायित्व बुझ्न र जिम्मेवार नागरिकका रूपमा अघि बढ्न प्रेरित गर्नु अभियानको प्रमुख उद्देश्य हो । कानुनसम्बन्धी आधारभूत ज्ञानले विद्यार्थीलाई सामाजिक तथा सार्वजनिक जीवनमा सचेत निर्णय लिनसमेत सहयोग पुग्ने अपेक्षा गरिएको छ ।
पहिलो दिन विद्यार्थीको उत्साहजनक सहभागिता देखिएपछि टिम पर्साले आगामी दिनमा पनि जिल्लाका विभिन्न विद्यालयमा कार्यक्रम सञ्चालन गरी कानुनी सचेतनाको दायरा विस्तार गर्ने लक्ष्य लिएको छ । अभियानले विद्यार्थीमा कानुनी ज्ञानसँगै नेतृत्व क्षमता र लोकतान्त्रिक मूल्यप्रतिको बुझाइ विकास गर्न योगदान पुर्याउने अपेक्षा गरिएको छ । 
प्रतिक्रिया दिनुहोस् !