वीरगंज (पर्सा), १० कात्तिक । बंगालको खाडीमा विकसित चक्रवात ‘अर्नब’ शक्तिशाली बन्दै गएपछि नेपालका विभिन्न प्रदेशमा वर्षा, हावाहुरी र हिमपातको जोखिम बढेको छ । चक्रवातको सम्भावित प्रभावलाई मध्यनजर गर्दै जिल्ला प्रशासन कार्यालय पर्साले जिल्लावासीलाई उच्च सतर्कता अपनाउन आग्रह गरेको छ ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार चक्रवात बुधबार भारतको आन्ध्र प्रदेश र विशाखापट्टनम आसपासका भू–भागमा पुग्ने सम्भावना छ । यसको प्रभाव नेपालमा बिहीबारदेखि देखिन सक्ने अनुमान गरिएको छ । विशेषगरी कोशी, मधेश, बागमती, गण्डकी र लुम्बिनी प्रदेशमा वर्षाको प्रभाव बढी पर्ने देखिएको छ भने कर्णाली र सुदूरपश्चिमका केही स्थानमा समेत वर्षा हुन सक्ने महाशाखाले जनाएको छ ।
महाशाखाले सोमबार जारी गरेको विशेष मौसमी बुलेटिनअनुसार कात्तिक १३ र १४ गते कोशी, मधेश, बागमती तथा गण्डकी प्रदेशका अधिकांश स्थानमा मेघगर्जन, चट्याङ र हावाहुरीसहित मध्यम वर्षा हुने सम्भावना छ । केही स्थानमा भारी वर्षा हुन सक्ने अनुमान गरिएको छ । लुम्बिनी प्रदेशका केही भूभागमा मध्यमदेखि भारी वर्षा तथा कर्णाली र सुदूरपश्चिमका केही स्थानमा मध्यम वर्षासँगै एक–दुई स्थानमा भारी वर्षा हुन सक्ने पूर्वानुमान छ ।
वर्षासँगै उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिमसमेत औँल्याइएको छ । सम्भावित प्रतिकूल मौसमलाई ध्यानमा राख्दै महाशाखाले उच्च हिमाली क्षेत्रमा पर्यटकलाई भ्रमण नगर्न र त्यहाँ पुगिसकेकालाई सुरक्षित स्थानमा रहन आग्रह गरेको छ ।
पर्सामा तीन दिन विशेष सतर्कता अपनाउन प्रशासनको आग्रह
चक्रवातको सम्भावित प्रभावबाट हुन सक्ने क्षति न्यूनीकरण गर्न जिल्ला प्रशासन कार्यालय पर्साले कात्तिक १२ देखि १४ गतेसम्म विशेष सावधानी अपनाउन जिल्लावासीलाई अनुरोध गरेको छ । मंगलबार जारी सूचनामा विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको मौसमसम्बन्धी पूर्वानुमानलाई उद्धृत गर्दै मधेश प्रदेशलगायतका क्षेत्रमा चट्याङ र हावाहुरीसहित मध्यमदेखि केही स्थानमा भारी वर्षा हुन सक्ने उल्लेख गरिएको छ ।
प्रशासनले पाकेको धानबाली काट्ने र भित्र्याउने काम बिहीबारअघि नै सम्पन्न गर्न किसानलाई आग्रह गरेको छ । निर्धारित समयभित्र कृषि कार्य पूरा गर्न नसकिए जोखिमपूर्ण मौसमको अवधिमा त्यस्ता काम स्थगित गर्न सुझाव दिइएको छ ।
त्यस्तै, अत्यावश्यक कामबाहेक यात्रा नगर्न र बाहिर निस्कनैपर्ने अवस्थामा मौसमको अवस्था बुझेर मात्र यात्रा गर्न प्रशासनले अनुरोध गरेको छ । सम्भावित वर्षाले नदी तथा खोलामा पानीको सतह बढाउन सक्ने भएकाले साना–ठूला नदीका तटीय क्षेत्र, खहरे खोला र बाढीको जोखिम भएका बस्तीमा बसोबास गर्ने नागरिकलाई विशेष सतर्क रहन भनिएको छ । 
हिमाली क्षेत्रमा हिमपहिरोको जोखिम, सडक यात्रामा पनि सावधानी
चक्रवातको प्रभावले वर्षा र हिमपात तीव्र भएमा जोखिमयुक्त सडक तथा पहिरो जान सक्ने क्षेत्रमा आवागमन प्रभावित हुन सक्ने सम्भावना छ । त्यसैले सम्बन्धित निकायले जारी गर्ने पूर्वसूचनालाई बेवास्ता नगर्न र जोखिम देखिएका क्षेत्रमा अनावश्यक आवतजावत नगर्न आग्रह गरिएको छ ।
मौसमको प्रतिकूल अवस्थाबाट हुन सक्ने जनधनको क्षति रोक्न प्रशासनले आधिकारिक सूचना नियमित रूपमा पछ्याउन र आवश्यक सुरक्षा उपाय अपनाउन जिल्लावासीलाई अनुरोध गरेको छ ।
आपत्कालीन जानकारीका लागि सम्पर्क नम्बर सार्वजनिक
सम्भावित विपद्को समयमा आवश्यक सूचना तथा सहयोग प्राप्त गर्न प्रशासनले विभिन्न सम्पर्क नम्बर सार्वजनिक गरेको छ । वर्षा तथा बाढीसम्बन्धी जानकारीका लागि ११५५, विपद्सम्बन्धी सूचनाका लागि १२३४, नेपाल प्रहरीका लागि १०० र सशस्त्र प्रहरी बलका लागि १११४ मा सम्पर्क गर्न सकिने सूचनामा उल्लेख छ ।
चक्रवातको सम्भावित प्रभावबाट बच्न मौसमको पूर्वानुमानलाई गम्भीरतापूर्वक लिन, जोखिमयुक्त गतिविधिबाट टाढा रहन र सम्बन्धित निकायको निर्देशन पालना गर्न प्रशासनले सबै जिल्लावासीलाई आग्रह गरेको छ । 
प्रतिक्रिया दिनुहोस् !