मोतिहारी (बिहार), ९ कात्तिक । भारतको बिहारस्थित पूर्वी चम्पारण जिल्लाको सुगौली थाना क्षेत्रअन्तर्गत भवानीपुर गाउँमा पुरानो रिसइबीलाई लिएर दुई पट्टीदार परिवारबीच हिंसात्मक झडप भएको छ । झडपका क्रममा दुवै पक्षबाट लाठी–डण्डा र इँटापत्थर प्रहार हुँदा करिब एक दर्जनभन्दा बढी मानिस घाइते भएका छन् ।
घटनापछि घाइतेहरूलाई उपचारका लागि सुगौली सामुदायिक स्वास्थ्य केन्द्रमा भर्ना गरिएको छ । गम्भीर घाइते केहीलाई थप उपचारका लागि मोतिहारी सदर अस्पताल पठाइएको बताइएको छ । सुगौली प्रखण्डअन्तर्गत उत्तरी छपरा बहास पञ्चायतको भवानीपुर गाउँमा गत आइतबार दुई पट्टीदार परिवारबीच सामान्य भनाभन भएको थियो ।
पुरानो विवादलाई लिएर सुरु भएको भनाभन केहीबेरमै हिंसात्मक झडपमा परिणत भएको थियो । त्यसपछि दुवै पक्षका मानिसहरू लाठी–डण्डा र इँटापत्थर लिएर एकअर्कामाथि जाइलागेका थिए ।
झडपको भिडियो सामाजिक सञ्जालमा भाइरल
घटनाको भिडियो सामाजिक सञ्जालमा तीव्र रूपमा फैलिएको छ । भिडियोमा दुवै पक्षका मानिसहरू एकअर्कामाथि लाठी–डण्डा प्रहार गर्नुका साथै इँटापत्थर हानिरहेको देखिन्छ । झडपका क्रममा केही मानिस घाइते भएर भुइँमा लडेको र स्थानीय बासिन्दाले उनीहरूलाई पानी खुवाउँदै अस्पताल लैजाने तयारी गरिरहेको दृश्यसमेत भिडियोमा देखिन्छ ।
भिडियोमा खुलेआम कुटपिट भइरहेको देखिए पनि घटनाका सबै पक्ष र परिस्थितिबारे प्रहरी अनुसन्धानपछि मात्रै यकिन विवरण सार्वजनिक हुने बताइएको छ ।
दुवै पक्षका मानिस घाइते
झडपमा एक पक्षका पल्टु सहनी, मुनीलाल सहनी, भोलालाल सहनी, अक्लु सहनी, चन्दन सहनी, राजेन्द्र सहनी र बिट्टु कुमारीसहित अन्य मानिस घाइते भएको प्रारम्भिक जानकारी प्राप्त भएको छ । अर्को पक्षका पनि तीन जनाभन्दा बढी घाइते भएको बताइएको छ । घटनामा घाइते हुनेहरूको यकिन संख्या तथा उनीहरूको स्वास्थ्य अवस्थाबारे विस्तृत विवरण आउन बाँकी छ ।
प्रहरीले सुरु गर्यो अनुसन्धान
सुगौली थानाध्यक्ष अनीश कुमार सिंहले सामाजिक सञ्जालमार्फत जानकारी दिँदै दुवै पक्षबाट उजुरी प्राप्त भएको बताएका छन् । प्रहरीले घटनासँग सम्बन्धित भाइरल भिडियोको जाँच गरिरहेको र आवश्यक कानुनी कारबाही अघि बढाइएको उनले जनाएका छन् । गाउँमा शान्ति–सुरक्षा कायम राख्न प्रहरीले निगरानीसमेत बढाएको छ ।
पुरानो रिसइबीका कारण भएको भनिएको उक्त घटनाबारे प्रहरीले थप अनुसन्धान गरिरहेको छ । स्थानीय प्रत्यक्षदर्शीका अनुसार झडपका क्रममा दुवै पक्षबाट लाठी–डण्डा प्रहार हुँदा अवस्था तनावपूर्ण बनेको थियो । झगडा छुट्याउन पुगेका स्थानीय बासिन्दासमेत घटनाबाट त्रसित भएका थिए । 
प्रतिक्रिया दिनुहोस् !