वीरगंज (पर्सा), ७ कात्तिक । राष्ट्रिय स्वतन्त्र पार्टी (रास्वपा) पर्साका सभापति एवं प्रतिनिधिसभा सदस्य हरि पन्तले आगामी स्थानीय तह निर्वाचनमा पार्टीको विधिसम्मत प्रक्रिया पूरा गर्ने योग्य व्यक्तिले मात्रै उम्मेदवारीको टिकट पाउने स्पष्ट पारेका छन् । पार्टीभित्र पद, पहुँच र नातेदारीका आधारमा टिकट वितरण नहुने भन्दै उनले योग्य नेता–कार्यकर्तालाई विचलित नहुन आग्रह गरेका छन् ।
शुक्रबार राति स्थानीय क्लासिक ब्याङ्क्वेटमा आयोजित बडादशैंको शुभकामना आदानप्रदान तथा टीका कार्यक्रममा सम्बोधन गर्दै सभापति पन्तले पार्टीको निर्धारित विधि र मापदण्डभन्दा बाहिर गएर कसैले पनि उम्मेदवारीको टिकट पाउन नसक्ने बताएका हुन् ।
रास्वपाको ‘हामी आउँदैछौँ’ अभियानको प्रसङ्ग उल्लेख गर्दै उनले आगामी निर्वाचनमा उम्मेदवार छनोटका लागि पार्टीले उम्मेदवार क्लब, पोलिटिकल प्रोक्सिमिटी, प्रारम्भिक निर्वाचन र समावेशिताको अवधारणा अघि सारेको जानकारी दिए । यी प्रक्रियाअन्तर्गत प्रशिक्षित, परीक्षित र योग्य ठहरिएका व्यक्तिले मात्रै पार्टीको आधिकारिक उम्मेदवार बन्ने अवसर पाउने उनको भनाइ थियो ।
‘नेतासँगको निकटता वा नातेदारीले टिकट पाइँदैन’
सभापति पन्तले जिल्ला सभापति, प्रदेश सभापति वा कुनै सांसदसँग निकट सम्बन्ध भएकै आधारमा उम्मेदवारीको टिकट पाउने अवस्था पार्टीमा नरहेको स्पष्ट पारे । नेताको नजिक भएको वा कुनै माननीयको नातेदार भएकै कारण टिकट पाइने परम्परालाई निरुत्साहित गर्दै पार्टीले योग्यता र निर्धारित प्रक्रियालाई प्राथमिकता दिने उनले बताए ।
विधिसम्मत प्रक्रियाबाट अघि बढ्ने योग्य व्यक्तिले अवसरबाट वञ्चित हुनुपर्ने अवस्था नआउने उल्लेख गर्दै पन्तले पार्टीको मापदण्डअनुसार अघि बढ्न नेता–कार्यकर्तालाई आग्रह गरे । पार्टीको आधिकारिक उम्मेदवार बन्न व्यक्तिगत पहुँचभन्दा पनि योग्यता, प्रतिस्पर्धा र निर्धारित प्रक्रियाको पालना महत्त्वपूर्ण हुने उनको भनाइ थियो ।
जिल्ला संगठन विभागका प्रमुख कृष्ण पासवानले सहजीकरण गरेको कार्यक्रममा सभापति पन्तले उपस्थित मान्यजनबाट टीका ग्रहण गर्नुका साथै सहभागीहरूलाई टीका लगाएर दशैंको शुभकामना आदानप्रदान गरेका थिए । कार्यक्रममा जिल्लास्तरीय नेताहरू तुलसा पौडेल, सुदिश प्रजापति र परवेज अख्तरसहित विभिन्न क्षेत्रका सभापति, पालिका सभापति, वडा सभापति तथा पार्टीका नेता–कार्यकर्ताहरूको उपस्थिति रहेको थियो ।
आगामी स्थानीय तह निर्वाचनलाई लक्षित गर्दै रास्वपाले उम्मेदवार छनोटमा विधि, योग्यता, प्रतिस्पर्धा र समावेशितालाई प्राथमिकता दिने सन्देश दिएको यस कार्यक्रमले पार्टीभित्र उम्मेदवारीका आकांक्षीहरूलाई निर्धारित प्रक्रियाप्रति स्पष्ट रहन संकेत गरेको छ । 
प्रतिक्रिया दिनुहोस् !