वीरगंज (पर्सा), २६ असोज । वीरगंजस्थित मितेरी पुलमा सशस्त्र प्रहरीले प्रतिबन्धित लागूऔषध ब्राउन सुगरजस्तो पदार्थ र गाँजासहित दुई जनालाई नियन्त्रणमा लिएको छ । भारतबाट नेपाल प्रवेश गर्दै गरेका एक युवक र नेपालबाट भारततर्फ जाँदै गरेका अर्का व्यक्तिलाई छुट्टाछुट्टै जाँचका क्रममा लागूऔषधसहित पक्राउ गरिएको हो ।
सशस्त्र प्रहरी बल, नेपाल नं. १३ गण हेडक्वार्टर पर्साका अनुसार आइतबार सशस्त्र प्रहरी सीमा सुरक्षा गुल्म वीरगंजबाट खटिएको टोलीले उनीहरूलाई नियन्त्रणमा लिएको हो । भारतबाट पैदल नेपालतर्फ आउँदै गरेका बाराको विश्रामपुर गाउँपालिका–५ नर्कुटवाका १८ वर्षीय शेख सहजातमाथि शंका लागेपछि जाँच गरिएको थियो ।
जाँचका क्रममा उनले बोकेको कुरकुरेको प्याकेटभित्र कालो प्लास्टिकमा लुकाएर राखिएको ४ ग्राम ८४० मिलिग्राम ब्राउन सुगरजस्तो देखिने पदार्थ फेला परेको सशस्त्र प्रहरीले जनाएको छ । सशस्त्र प्रहरीको डग स्क्वाड र बोर्डर इन्टरएक्सन टिम (बीआईटी) को संयुक्त टोलीले उनलाई नियन्त्रणमा लिएको हो ।
त्यसैगरी, नेपालबाट पैदल भारततर्फ जाँदै गरेका बाराको बारागढी गाउँपालिका–३ का ४१ वर्षीय जमिल अख्तर मियाँ पनि लागूऔषधसहित पक्राउ परेका छन् । उनले बोकेको झोलाभित्र लुकाएर लैजाँदै गरेको अवस्थामा ४ किलो ८५ ग्राम प्रतिबन्धित लागूऔषध गाँजा बरामद भएको सशस्त्र प्रहरीले जानकारी दिएको छ ।
पक्राउ परेका दुवै जनालाई थप अनुसन्धान तथा आवश्यक कानुनी कारबाहीका लागि वडा प्रहरी कार्यालय बिर्ता, पर्सामा बुझाइएको सशस्त्र प्रहरी बल, नेपाल नं. १३ गण हेडक्वार्टर पर्साका सूचना अधिकारी सशस्त्र प्रहरी नायब उपरीक्षक सुरज क्षेत्रीले बताए । 
प्रतिक्रिया दिनुहोस् !