मलङ्गवा (सर्लाही), २१ असोज । सर्लाहीको मलंगवा नगरपालिकाका एक इन्जिनियरलाई १ लाख रुपैयाँ घुससहित अख्तियार दुरुपयोग अनुसन्धान आयोगले नियन्त्रणमा लिएको छ । आयोगको बर्दिबास कार्यालयबाट खटिएको टोलीले मलंगवा नगरपालिकाको प्राविधिक शाखामा कार्यरत इन्जिनियर डिकेश यादवलाई मंगलबार साँझ सेवाग्राहीबाट घुसको रकम लिँदै गरेको अवस्थामा नियन्त्रणमा लिएको हो ।
अख्तियार स्रोतका अनुसार नक्सा पास गरिदिने भन्दै सेवाग्राहीसँग रकम मागेको सूचना पाएपछि टोली मलंगवा नगरपालिका पुगेको थियो । सोही क्रममा यादवलाई सेवाग्राहीबाट १ लाख रुपैयाँ लिँदै गरेको अवस्थामा नियन्त्रणमा लिइएको हो । यादवसँगै अर्का एक जनालाई पनि अख्तियारको टोलीले नियन्त्रणमा लिएको छ । ती व्यक्तिको परिचय र घटनामा उनको संलग्नताबारे भने आयोगले थप विवरण सार्वजनिक गरेको छैन ।
नियन्त्रणमा लिइएका यादवसहितका व्यक्तिमाथि घटनाबारे आवश्यक अनुसन्धान अघि बढाइएको अख्तियारको बर्दिबास कार्यालयले जनाएको छ । 
प्रतिक्रिया दिनुहोस् !