जनकपुरधाम (धनुषा), २४ भदौ । जेन–जी आन्दोलनका क्रममा भएको आगजनी र तोडफोडको एक वर्ष पूरा भए पनि मधेश प्रदेशका क्षतिग्रस्त सरकारी संरचनाको पुनर्निर्माण अझै पूरा हुन सकेको छैन । आन्दोलनका क्रममा क्षति पुगेका कतिपय कार्यालय सामान्य मर्मतसम्भारपछि सञ्चालनमा ल्याइए पनि पूर्ण रूपमा क्षतिग्रस्त तथा आंशिक क्षति भएका संरचनाको पुनर्निर्माण र मर्मतको काम भने अधुरै छ ।
गत वर्ष भदौ २३ र २४ गते देशभर भएको जेन–जी प्रदर्शनका क्रममा मधेश प्रदेशका मन्त्रालयहरू रहेको मधेश भवन, प्रदेशसभा भवन, प्रहरी कार्यालय तथा विभिन्न सरकारी र सार्वजनिक संरचनामा आगजनी तथा तोडफोड भएको थियो । आन्दोलनका क्रममा प्रदेशका ९० वटा प्रहरी कार्यालयमा क्षति पुगेको थियो । क्षति पुगेका प्रहरी कार्यालयमध्ये १३ वटा पूर्ण रूपमा क्षतिग्रस्त भएका थिए भने ७७ वटा कार्यालयमा आंशिक क्षति पुगेको थियो । ती कार्यालयलाई आवश्यक व्यवस्थापन गरी पुनः सञ्चालनमा ल्याइए पनि पूर्ण क्षति भएका भवनको पुनर्निर्माण तथा आंशिक क्षति भएका संरचनाको मर्मत अझै पूर्ण हुन सकेको छैन ।
मधेश भवनका तीनवटा भवन मर्मतसम्भार गरी मन्त्रालयका रूपमा प्रयोगमा ल्याइएका छन् । तर, यसअघि मुख्यमन्त्री तथा मन्त्रिपरिषद्को कार्यालयका रूपमा प्रयोग हुँदै आएको भवन भने अझै बन्द अवस्थामा छ । क्षतिग्रस्त संरचनाको पुनर्निर्माण नहुँदा प्रदेश सरकारका कार्यालय सञ्चालन र सेवा प्रवाहमा समेत समस्या देखिएको छ । आन्दोलनका क्रममा मधेश प्रदेशका विभिन्न २०७ वटा सरकारी तथा सार्वजनिक कार्यालयमा आगजनी तथा तोडफोड भएको थियो । ठूलो संख्यामा कार्यालय तथा सार्वजनिक संरचनामा क्षति पुगे पनि एक वर्षसम्म पुनर्निर्माणको काम अपेक्षित गतिमा अघि बढ्न नसकेको देखिन्छ ।
क्षतिग्रस्त भवनको पुनर्निर्माणमा भएको ढिलाइले सेवा प्रवाहमा समेत प्रत्यक्ष असर पारेको छ । कतिपय कार्यालयमा उपलब्ध संरचनालाई नै मिलाएर कर्मचारी र सेवाग्राहीका लागि काम चलाइएको छ । सामान्य मर्मतपछि कार्यालय सञ्चालनमा आए पनि पर्याप्त पूर्वाधारको अभावमा नियमित काम गर्न कठिनाइ भइरहेको कर्मचारीहरू बताउँछन् ।
विशेषगरी पूर्ण रूपमा क्षतिग्रस्त भएका कार्यालयका लागि नयाँ संरचना निर्माण आवश्यक रहे पनि त्यसतर्फको काम अघि बढ्न नसक्दा कार्यालय सञ्चालनको वैकल्पिक व्यवस्था गर्नुपर्ने अवस्था छ । केही कार्यालयमा क्षतिग्रस्त संरचनाका कारण अभिलेख व्यवस्थापन, कर्मचारी बस्ने स्थान तथा सेवाग्राहीका लागि आवश्यक भौतिक सुविधा व्यवस्थापनमा समेत समस्या देखिएको छ ।
जेन–जी आन्दोलनका क्रममा मधेश प्रदेशमा ८४ जना प्रहरी र १२ जना सर्वसाधारण घाइते भएका थिए भने एक जनाको मृत्यु भएको थियो । आन्दोलनको क्रममा भएको भौतिक क्षतिको पुनर्निर्माण एक वर्षसम्म पनि पूर्ण हुन नसक्दा आन्दोलनपछि पुनःस्थापनाको काम अझै चुनौतीपूर्ण रहेको देखिएको छ ।
प्रतिक्रिया दिनुहोस् !