सप्तरी, ११ भदौ । रसुवामा बुधबार गएको बाढीका कारण सप्तरीका २४ जना नागरिक सम्पर्कविहीन बनेका छन् । जिल्लाको बोदेबरसाइन नगरपालिका-८ काचनका एकै परिवारका तीन दाजुभाइसहित २४ जना सम्पर्कविहीन भएका परिवार तथा आफन्तले जानकारी दिएका छन् । तीन छोरा ३५ वर्षीय शिवकुमार यादव, ३१ वर्षीय देवकुमार यादव र २५ वर्षीय सचिन यादवसम्पर्कविहीन भएका बुबा लालबहादुर यादवले जानकारी दिए । उनका अनुसार तीनै जना रसुवास्थित अपर त्रिशूली-१ जलविद्युत् आयोजनामा कार्यरत थिए । उनले भने, “सम्पर्कविहीन भएका तीन जना छोरामध्ये देवकुमार इन्जिनियर, सचित ओभरसियर र शिवकुमार सुपरभाइजरको पदमा कार्यरत थिए । रसुवाम बाढी आएपछि तीनै जना छोराहरूसँग बुधबार बिहानदेखि अहिलेसम्म सम्पर्क हुन सकेको छैन ।”
सुरुङ्गा नगरपालिका-२ का इन्जिनियर सरोज चौधरी पनि सम्पर्कविहीन रहेका सुरुङ्गा नगरपालिकाका प्रमुख गीता चौधरीले जानकारी दिइन् । उनी रसुवामा मैलुङ जलविद्युत् आयोजनामा कार्यरत थिए । त्यसैगरी, कञ्चनपुर नगरपालिकाका अनशा चौधरी, विष्णुपुर गाउँपालिका-१ खुरुरियाका इन्जिनियर अजयकुमार यादव, शम्भुनाथ नगरपालिका-६ कठौनाका सहायक इन्जिनियर ओमप्रकाश चौधरी, शम्भुनाथ नगरपालिका-८ का साजन चौधरी, सोही पालिका वडा नं ४ का प्रेमसागर चौधरी, पिताम्बर दास, शम्भुनाथ नगरपालिका-३ का रमेश चौधरी, दीपेन्द्र चौधरी, खडक नगरपालिकाका अनिलकुमार चौधरी, वडा नं १० का सुरज मण्डल, शिवकुमार पासवान, राज पासवान र हेमनारायण साह, कञ्चनपुर नगरपालिका-३ का अमरकान्त, तिलाठी कोइलाडी गाउँपालिकाका राजीवकुमार सिंहसहित सम्पर्कविहीन रहेकाे जानकारीमा आएको जिल्ला प्रहरी कार्यालयका प्रहरी निरीक्षक विजय कार्कीले जानकारी दिए ।
सम्पर्कविहीन १७ जनाको नाम आइसकेको बताउँदै उनले बाँकीको विवरण आउने क्रम अझै रहेको जानकारी दिए । “हामीले लिखित निवेदन माग गरेका छौँ । यो कठिन परिस्थितिमा आफ्ना आफन्त परिवारका सदस्य सम्पर्कविहीन भएको भए उहाँहरूको खोजी तीव्र पार्न सम्पर्कविहीन व्यक्तिको नाम, थर, स्थायी ठेगाना, सम्पर्क नम्बर तथा हाल बसोबास गरिरहेको स्थानलगायत विवरण नजिकको प्रहरी कार्यालयमा उपलब्ध गराउन आग्रह छ ।” रासस
प्रतिक्रिया दिनुहोस् !