सिमरा (कलैया), १ साउन । जितपुरसिमरा उपमहानगरपालिकाले नगर अस्पतालमा सर्पदंश उपचार सेवा सञ्चालनका लागि आवश्यक अनुमति प्रदान गर्न इपिडिमियोलोजी तथा रोग नियन्त्रण महाशाखा, टेकुलाई अनुरोध गरेको छ । नगर प्रमुख राजन पौडेल र प्रमुख प्रशासकीय अधिकृत डमरु प्रसाद निरौलाले हस्ताक्षर गरेको पत्रमार्फत नगर अस्पतालको अनुगमन गरी सर्पदंश उपचार सेवा सञ्चालनको आधिकारिक अनुमति प्रदान गर्न महाशाखासँग आग्रह गरिएको हो ।
नगर अस्पतालमा विगत तीन वर्षदेखि मेडिकल अफिसर, नर्स तथा पारामेडिक्ससहितको टोलीबाट २४ घण्टा आकस्मिक सेवा सञ्चालन हुँदै आएको उपमहानगरपालिकाले जनाएको छ । सर्पदंश उपचारका लागि आवश्यक औषधि, उपकरण तथा भौतिक पूर्वाधारको तयारीसमेत पूरा भइसकेकाले महाशाखाबाट स्वीकृति प्राप्त हुनासाथ सेवा सञ्चालन गर्न अस्पताल सक्षम रहेको जनाइएको छ । जितपुरसिमरा क्षेत्रमा वैशाखदेखि कात्तिकसम्म सर्पदंशका घटना बढी हुने गरेका छन् ।
उपमहानगरपालिकाका अनुसार यस क्षेत्रमा वार्षिक औसत ५० देखि ५५ जना सर्पदंशबाट प्रभावित हुने गरेका छन् । हाल सर्पदंशका बिरामीलाई उपचारका लागि करिब ४० किलोमिटर टाढा रहेको कलैया प्रादेशिक अस्पताल वा करिब ३० किलोमिटर दूरीमा रहेको नारायणी अस्पताल, वीरगंज लैजानुपर्ने बाध्यता छ । समयमै उपचार नपाउँदा चालु आर्थिक वर्षमा दुई जना बालबालिकाको मृत्यु भइसकेको अवस्थालाई ध्यानमा राख्दै स्थानीयस्तरमै सर्पदंश उपचार केन्द्र स्थापना गर्न पहल गरिएको उपमहानगरपालिकाले जनाएको छ ।
नगर अस्पतालबाटै सर्पदंश उपचार सेवा सञ्चालनमा आएमा बिरामीलाई टाढाका अस्पतालमा लैजानुपर्ने बाध्यता अन्त्य हुनुका साथै उपचारमा हुने ढिलाइबाट जोगाउन र सर्पदंशका कारण हुने मृत्यु तथा अपाङ्गता न्यूनीकरणमा सहयोग पुग्ने अपेक्षा गरिएको छ ।
प्रतिक्रिया दिनुहोस् !