जनकपुरधाम (धनुषा), १ साउन । जातीयता, विभाजन र संकीर्ण सोचभन्दा माथि उठेर हिन्दू समाजको अस्तित्व, पहिचान र उत्थानका लागि एकताबद्ध हुनुपर्नेमा जनकपुरधाम उपमहानगरपालिकाका मेयर मनोज कुमार साहले जोड दिएका छन् । उनले हिन्दू समाजको एकता नै सबैभन्दा ठूलो शक्ति भएको उल्लेख गर्दै यसको संरक्षण र सुदृढीकरणमा विशेषगरी युवा पुस्ताले अग्रणी भूमिका खेल्नुपर्ने बताएका छन् । हिन्दू स्वयंसेवक संघ नेपाल, जनकपुरधामद्वारा शनिबार जनकपुरधामस्थित राम युवा समितिको प्राङ्गणमा आयोजित ‘गुरु दक्षिणा अर्पण कार्यक्रम’लाई प्रमुख अतिथिका रूपमा सम्बोधन गर्दै मेयर साहले सबै धर्मप्रति सम्मान राख्दै आफ्नो धर्म, संस्कृति र अस्तित्वको संरक्षणका लागि पनि सचेत र संगठित हुनुपर्ने बताए ।
उनले भने, ‘हामीले जातीयताभन्दा माथि उठेर हिन्दूहरूको उत्थानका लागि एकताबद्ध हुनुपर्छ । एकता नै शक्ति हो । हामी सबै धर्मको सम्मान गर्छौं । तर हामी हिन्दू भएकाले आफ्नो अस्तित्व र पहिचानको रक्षा गर्नु पनि हाम्रो दायित्व हो ।’ मेयर साहले समाजमा धार्मिक, सांस्कृतिक र सामाजिक चेतनाको विकाससँगै नयाँ पुस्तालाई आफ्नो इतिहास, संस्कार र सभ्यतासँग जोड्न आवश्यक रहेको बताए । हिन्दू समाजको संरक्षण केवल भाषण र नारामा सीमित हुन नहुने उल्लेख गर्दै उनले संगठित प्रयास, सामाजिक जागरण र युवा सहभागितालाई प्राथमिकता दिनुपर्ने धारणा राखे ।
कार्यक्रमका मुख्य वक्ता तथा पूर्व प्रहरी अतिरिक्त महानिरीक्षक एवं हिन्दू स्वयंसेवक संघ नेपालका संघचालक कल्याण तिमिस्लानाले गुरु दक्षिणाको धार्मिक, सांस्कृतिक र संगठनात्मक महत्त्वमाथि प्रकाश पारे । उनले गुरु–शिष्य परम्पराले ज्ञान, अनुशासन, संस्कार र सामाजिक उत्तरदायित्वलाई जोड्ने बताउँदै हिन्दू समाजको एकता आजको आवश्यकता भएको धारणा राखे । नेपालको धार्मिक तथा सामाजिक परिवेशमा देखापरिरहेका परिवर्तनबारे चर्चा गर्दै तिमिस्लानाले धार्मिक धर्म परिवर्तनको बढ्दो गतिविधिप्रति चिन्ता व्यक्त गरे । उनले हिन्दू समाज आफ्नो संस्कार, संस्कृति र पहिचानप्रति सचेत र संगठित हुनुपर्नेमा जोड दिए ।
उनले भने, हिन्दू समाजभित्रकै जातीय विभाजन, आपसी दूरी र संगठनात्मक कमजोरीलाई अन्त्य गर्दै साझा पहिचान र उद्देश्यका आधारमा अघि बढ्नुपर्ने आवश्यकता छ । समाजको सांस्कृतिक संरक्षणका लागि परिवारदेखि नै नयाँ पुस्तालाई धर्म, संस्कार र सभ्यताबारे जानकारी गराउनुपर्ने उनको भनाइ थियो । कार्यक्रममा ठूलो संख्यामा हिन्दू स्वयंसेवकहरूको उपस्थिति रहेको थियो । सहभागीहरूले गुरु परम्परा, सामाजिक एकता, धार्मिक चेतना तथा हिन्दू समाजको संगठनात्मक सुदृढीकरणका विषयमा चासो व्यक्त गरेका थिए ।
जनकपुरधामजस्तो ऐतिहासिक, धार्मिक र सांस्कृतिक महत्व बोकेको शहरमा आयोजित गुरु दक्षिणा अर्पण कार्यक्रमले हिन्दू समाजको एकता, सांस्कृतिक पहिचान र युवा सहभागितालाई केन्द्रमा राखेको आयोजक पक्षले जनाएको छ । ‘सबै धर्मप्रति सम्मान कायम राख्दै आफ्नो धर्म, संस्कृति र पहिचानको संरक्षणका लागि हिन्दू समाजभित्र एकता, जागरण र सक्रियता आवश्यक छ । त्यसका लागि अब युवा पुस्ता अगाडि बढ्नुपर्ने समय आएको छ ।’ कार्यक्रमले यही सन्देश दिएकोसहभागीहरूको भनाइ छ ।
प्रतिक्रिया दिनुहोस् !