जनकपुरधाम (धनुषा), २३ साउन । धनुषाको मिथिला नगरपालिका–७, ढल्केबरमा प्रस्तावित ट्रमा सेन्टर अन्यत्र सार्ने प्रयास भएको भन्दै स्थानीयले चरणबद्ध आन्दोलनको घोषणा गरेका छन् । ट्रमा सेन्टर प्रस्तावित स्थानमै निर्माण गर्नुपर्ने मागसहित गठित संघर्ष समितिले शुक्रबार ढल्केबरमा पत्रकार सम्मेलन गरी आन्दोलनका कार्यक्रम सार्वजनिक गरेको हो । समितिका अनुसार साउन २३ गते ढल्केबरमा राँके जुलुस निकालिनेछ । त्यसपछि साउन २४ गते पूर्व–पश्चिम राजमार्गअन्तर्गत ढल्केबर क्षेत्रमा आधा घण्टा चक्काजाम गरिनेछ । साउन २५ गतेदेखि चक्काजामको अवधि क्रमशः बढाउँदै लगिने समितिले जनाएको छ ।
यसैगरी, साउन २६ गते बिहान ११ बजेदेखि दिउँसो १२ बजेसम्म तथा साउन २७ गते बिहान ११ बजेदेखि दिउँसो १ बजेसम्म पूर्व–पश्चिम राजमार्ग अवरुद्ध गर्ने कार्यक्रम तय गरिएको छ । यसअघि संघर्ष समितिले धनुषाका प्रमुख जिल्ला अधिकारी प्रेमप्रसाद लुइँटेलमार्फत नेपाल सरकारलाई ज्ञापनपत्र बुझाउँदै ढल्केबरमै ट्रमा सेन्टर निर्माण गर्न माग गरेको थियो । स्वास्थ्य तथा खाद्य स्वच्छता मन्त्री निशा मेहताले बुधबार प्रतिनिधिसभामा ट्रमा सेन्टर लहानमा निर्माण हुने जानकारी दिएपछि ढल्केबरमा विरोध चर्किएको हो । स्थानीयले सरकारले यसअघि गरेको निर्णय र बजेट विनियोजनविपरीत ट्रमा सेन्टरको स्थान परिवर्तन गर्न खोजिएको आरोप लगाएका छन् ।
संघीय सरकारले आर्थिक वर्ष २०७८/७९ को बजेटमार्फत मिथिला नगरपालिका–७ (साविक ढल्केबर गाविस–२ ‘क’) को कित्ता नम्बर १६९ मा रहेको चार बिघा ऐलानी जग्गामा ट्रमा सेन्टर निर्माणका लागि पहिलोपटक बजेट विनियोजन गरेको थियो । मिथिला नगरपालिकाका प्रमुख महतोका अनुसार ट्रमा सेन्टर निर्माणका लागि आवश्यक जग्गा प्राप्तिको सम्पूर्ण प्रक्रिया पूरा भइसकेको छ भने जग्गाको लालपुर्जा समेत तयार भइसकेको छ । त्यसैले सरकारले विगतमा अघि बढाएको योजना कार्यान्वयन गर्नुपर्ने उनको भनाइ छ ।
यता मन्त्री मेहताले शुक्रबार सामाजिक सञ्जाल फेसबुकमार्फत ढल्केबरमै ट्रमा सेन्टर निर्माण गर्ने सरकारको योजना यथावत् रहेको स्पष्ट पार्दै भ्रममा नपर्न आग्रह गरेकी थिइन् । तर, नगर प्रमुख महतोले प्रतिनिधिसभामा मन्त्रीले दिएको अभिव्यक्ति र सामाजिक सञ्जालमा सार्वजनिक गरिएको स्पष्टीकरणबीच विरोधाभास रहेको उल्लेख गर्दै फेसबुकमार्फत आएको धारणाले मात्रै स्थानीयको आशंका हट्न नसक्ने बताए । ढल्केबरमा ट्रमा सेन्टर निर्माणको मागलाई लिएर आन्दोलनका कार्यक्रम सार्वजनिक भएसँगै पूर्व–पश्चिम राजमार्गमा हुने चक्काजामका कारण यातायात सेवा प्रभावित हुन सक्ने देखिएको छ ।
प्रतिक्रिया दिनुहोस् !