वीरगंज (पर्सा), १३ साउन । नेपाली कांग्रेसका केन्द्रीय सदस्य तथा पूर्वमन्त्री रमेश रिजालले वर्तमान सरकार बहुमतको आडमा अहंकारी र अराजक बन्दै गएको आरोप लगाउँदै समयमै सचेत नभए मुलुक गम्भीर संकटतर्फ धकेलिन सक्ने चेतावनी दिएका छन् । उनले सरकार जनताका दैनिक समस्या समाधानभन्दा सत्ता र बहुमतको दम्भमा अल्मलिएको टिप्पणी गरे ।
पर्साको जगरनाथपुर गाउँपालिकाले ‘समृद्धिका लागि वन’ परियोजनाअन्तर्गत आयोजना गरेको वृक्षारोपण कार्यक्रमको उद्घाटन गर्दै रिजालले सीमावर्ती क्षेत्रका नागरिकले हरेक दिन अनेकौं कठिनाइ भोगिरहेको र किसानहरू रासायनिक मलको अभावले आक्रान्त भइरहेका बेला सरकार भने जनजीविकाका मुद्दाप्रति संवेदनशील बन्न नसकेको बताए । उनले वर्तमान सरकारको कार्यशैलीले मुलुकलाई सही दिशामा अघि बढाउन नसकेको दाबी गर्दै अहंकार र अराजक प्रवृत्ति कायम रहे देशले गम्भीर परिणाम भोग्नुपर्ने अवस्था आउन सक्ने चेतावनी दिए ।
राष्ट्रिय स्वतन्त्र पार्टी (रास्वपा)प्रति संकेत गर्दै रिजालले स्पष्ट नीति, एजेन्डा र दीर्घकालीन कार्यक्रमबिनै सरकारमा सहभागी भएकाले जनताले अपेक्षा गरेको उपलब्धि हासिल हुन नसक्ने दाबी गरे । उनले ‘घण्टीको सरकारका कारण आगामी दिन अझ चुनौतीपूर्ण बन्न सक्छन्, त्यसैले सम्पूर्ण नेपाली नागरिक सचेत र जिम्मेवार हुन आवश्यक छ,’ भन्ने धारणा व्यक्त गरे । पूर्वमन्त्री रिजालले नेपाली कांग्रेसले पनि विगतमा केही कमजोरी गरेको स्वीकार गर्दै अब ती त्रुटिबाट पाठ सिकेर जनविश्वास पुनः स्थापित गर्ने गरी जनपक्षीय काममा केन्द्रित हुनुपर्ने बताए । उनले पार्टीलाई आत्मसमीक्षासहित जनताको अपेक्षाअनुसार अघि बढ्न आग्रह गरे ।
जगरनाथपुर गाउँपालिका अध्यक्ष श्रीकान्त प्रसाद यादवको अध्यक्षतामा सम्पन्न कार्यक्रममा नेपाली कांग्रेस पर्साका सभापति तथा प्रदेशसभा सदस्य जनार्दन सिंह क्षेत्री, पूर्व प्रदेशसभा सदस्य प्रह्लाद गिरी, कांग्रेस मधेश प्रदेशका महामन्त्री बृहस्पति कृष्ण श्रेष्ठ, नेकपा (एमाले)का नेता वीरेन्द्र यादव, गाउँपालिकाकी उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, गादीमाई साझेदारी वन उपभोक्ता समूहका अध्यक्ष सहरुम राउत गद्दी तथा वडाध्यक्षहरू नेपाली कुशवाहा, सुभाष यादव, अयोध्या पटेललगायतको उपस्थिति रहेको थियो ।
प्रतिक्रिया दिनुहोस् !